तेस्रो बालसाहित्य महोत्सव : बालसाहित्य र सम्पदा–संस्कृतिमा बहस

तेस्रो बालसाहित्य महोत्सव मंगलबार सम्पन्न भएको छ ।

नेपाल बालसाहित्य समाज, ललितपुर महानगरपालिका र पाटन संग्रहालयको आयोजना र विभिन्न संघसंस्थाको सहआयोजनामा यही माघ ११ गतेदेखि ललितपुरको पाटन संग्रहालयमा आयोजना गरिएको महोत्सव मंगलबार सम्पन्न भएको हो ।

महोत्सव अवधिभर बालसाहित्य र बालसरोकारका विविध विषयमा कार्यपत्र प्रस्तुति, समूहगत छलफल, पुस्तक विमोचन, बाल प्रतिभा प्रदर्शनीसहित बाल पुस्तक प्रदर्शनीका साथै संग्रहालय प्रदर्शनीसमेत गरिएको थियो ।

मंगलबार सम्पदा, संस्कृति र बालबालिका विषयको समूह छलफलमा वक्ताहरु पाटन संग्रहालयका कार्यकारी निर्देशक रमेशराज पौडेल,वरिष्ठ बालसाहित्यकार डा. शैलेन्दुप्रकाश नेपाल र मिस नेवा, नेपाल संवत् ११४५ प्रलिशा शाक्यसँग पाटन संग्रहालयका संग्रहालय अधिकृत सुरेशमान लाखेले बहस गर्नुभएकाे थियाे ।

उक्त बहसमा बालबालिकाको ज्ञानको दायरा फराकिलो बनाउन सम्पदा र संस्कृतिको योगदानबारे चर्चा गरिएको थियो ।

त्यस्तै अर्को समूह छलफल बालसाहित्यको बदलिँदो स्वरुपमा पत्रकार सुशीला तामाङले वक्ताहरु वरिष्ठ बालसाहित्य इतिहासकार प्रमोद प्रधान, समालोचक तथा अनुवादक महेश पौड्याल र लेखक अनुराधासँग बहस गर्नुभएकाे थियाे ।

सोही क्रममा दुई सत्रमा बालकृतिहरु समेत विमोचन गरियो ।

कोपिला किताबको आयोजनमा वरिष्ठ बालसाहित्यकार विजयराज न्यौपानेको नयाँ बालकाव्य कृति– सारथि दिदी, विराज राईको ऐना र ध्रुब श्रेष्ठको हाम्रो नेपाल, राम्रो नेपाल कृतिको विमोचन गरिएको थियो भने नेपाल बालसाहित्य समाज र पाटन संग्रहालयको संयुक्त प्रयासमा गरिएको कार्यशालाबाट तयार पारिएका पाटनका सम्पदाबारेका कथाहरु पाटनका कथाहरु विमोचन गरिएको थियो ।