भ्याली पब्लिकका तीन टोली क्वाटरफाइनलमा

आयोजक भ्याली पब्लिकको ३ टोली १९ औं भ्याली पब्लिक कप अन्तरविद्यालय बास्केटबल प्रतियोगितामा बिहीबार क्वाटरफाइनलमा प्रवेश गरेका छन् । भ्याली पब्लिकका गर्ल्सका द्ई तथा सिनियर ब्वाइजकाे एक टोली क्वाटरफाइनलमा पुगेका हुन् ।

भंगालस्थित घरेलु कोर्टमा भएको गर्ल्सको प्रतिस्पर्धामा भ्याली पब्लिक ‘बी’ ले सत्यसाइलाई २१–२० को झिनो अन्तरले हरायो । जितमा सानीमाया तामाङले १० अंक योगदान गर्नुभयाे । दृष्य गुरुङको १० अंक सहयोगमा भ्याली पब्लिक ‘ए’ ले क्यान्भासलाई २५–१७ ले हरायो ।

सिनियर ब्वइजमा भ्याली पब्लिकले हिमशिलालाई ६७–५० ले पाखा लगायो । विजेताका अशोक विश्वकर्माले ३१ स्कोर गर्नुभयाे । सोही स्पर्धामा बागमतीले स्कोलर्स होमलाई ४९–३८ ले पन्छ्याउदै क्वाटरफाइनलमा स्थान बनायो । बागमतीका आर्यन श्रेष्ठले २१ अंक जोड्नुभयाे ।

सिनियर गर्ल्सको अन्य खेलमा त्रिज्योतिले वेदव्यासलाई २५–१६ तथा बागमतीले एन्जल्स हार्ट नेसनल स्कुललाई १९–११ ले पाखा लगाउँदै क्वाटरफाइनलमा स्थान सुरक्षित गरे । त्रिज्योतिकी प्रिस्ना तामाङले १० तथा बागमतीकी डिकी शेर्पाले ९ अंक जोड्नुभयाे ।

जुनियर ब्वाइजमा भने भ्याली पब्लिक चुक्यो । पारामाउन्ट एकेडेमीले भ्याली पब्लिकमाथि २१–१५ को जित दर्ता गर्दै क्वाटरफाइनल यात्रा तय गर्न सफल भयाे ।