बालबालिकालाई निर्वाचनमा प्रयाेग नगर्न आयाेगकाे ध्यानाकर्षण

बालबालिका शान्ति क्षेत्र राष्ट्रिय अभियानले आगामी निर्वाचनमा विद्यालय र बालबालिकालाई प्रयोग नगर्नका निम्ति निर्वाचन आयोगका कार्यवाहक प्रमुख निर्वाचन आयुक्त रामप्रसाद भण्डारीलाई ध्यानाकर्षण गराएको छ ।

अभियानका अध्यक्ष तिलोतम पौडेलको नेतृत्वमा गएको टोलीले निर्वाचन आयोगका कार्यवाहक प्रमुख निर्वाचन आयुक्तलाई ध्यानाकर्षण गराएको हो । 

कावा प्रमुख आयुक्त भण्डारीले निर्वाचनको आचार संहिताभित्र रहेर बालबालिकाको प्रयोग हुन नदिने तर्फ आयोग सचेत रहेको बताउनुभयाे ।

बालबालिकासम्बन्धी विद्यमान कानूनी प्रावधानको कार्यान्वयनका लागि पहलकदमी, मतदान अघि, मतदानको दिन र मतदान पश्चात्को अवधिमा बालअधिकार अनुगमन लगायतका कार्यहरू गर्दै जनचेतनामुलक विभिन्न पर्चा, पम्पेलेट, टिकटक सन्देश, म्यासेजलगायतका विभिन्न माध्यामबाट प्रभावकारी सञ्चार समेत गरिँदै आएको अभियानद्वारा जारी ध्यानाकर्षणपत्रमा उल्लेख छ ।

सात प्रदेशका ५० जिल्लाका १०७ वटा सदस्य संस्था भएको विद्यालय र बालबालिका शान्ति क्षेत्र हुन् बालबालिका राष्ट्रिय गर्व हुन् भन्ने अभियानमा सन् २००० देखि नै बालअधिकारको संरक्षण सम्बर्धनमा काम गर्दै आइरहेको सिजपले आगामी फागुन २१ गते हुने निर्वाचनलाई केन्द्रबिन्दुमा राखी बालबालिका सम्बन्धी ऐन निर्वाचन आचार संहिता राष्ट्रिय अन्तर्राष्ट्रिय प्रतिबद्धतालाई समेत आधार मानी कुनै पनि राजनीतिक पार्टीले १८ वर्षभन्दा मुनिका बालबालिकालाई निर्वाचनका कुनै पनि गतिविधिहरुमा सहभागी नगराउन भन्ने व्यवस्थालाई प्रभावकारी अनुगमनको निम्ति आयोगलाई अनुरोध गरेको हो ।