अन्तरविद्यालय बास्केटबलमा पुष्पसदन र रेडियन्ट पब्लिककाे जित

आयोजक पुष्पसदन र रेडियन्ट पब्लिकले चौथो पुष्पसदन कप उपत्यकाव्यापी अन्तरविद्यालय बास्केटबल प्रतियोगिताको सिनियर ब्वाइजमा मंगलबार जित हात पारेका छन् ।

कीर्तिपुरस्थित घरेलु कोर्टमा पुष्पसदनले न्यु जेनिथलाई ३६–२७ तथा रेडियन्ट पब्लिकले निःसर्गलाई ४५–२४ ले पराजित गरे । पुष्पसदनका सम्राट लामाले १३ तथा रेडियन्ट पब्लिकका विदानले ११ अंक जोड्नुभयाे ।

सिनियर ब्वाइजमै राराहिलले मेगसलाई ३५–२४, रेडियन्ट रिडर्सले क्रिएटिभलाई २८–२१, युनाइटेड युनिभर्सलले ग्रिन भिलेजलाई १९–१२, भ्याली भ्युले स्वर्णिमलाई ४०–३५ र राराहिलले लिटिल एन्जल्सलाई ४६–३१ ले हराए ।

जुनियर ब्वाइजमा भ्याली भ्युले मंगललाई २४–२ तथा राराहिलले ग्रिनफिल्डलाई २०–१५ ले पाखा लगाए । भ्याली भ्यूका जेनिश भुसालले १० तथा राराहिलका निसान केसीले १८ स्कोर गर्नुभयाे ।