बालसंसारको नयाँ बालगीत ‘एउटी सुन्दर परी’ सार्वजनिक (भिडियाे)

 

बालबालिकाका लागि शैक्षिक तथा मनोरञ्जनात्मक सामग्री निर्माण गर्दै आएको बालसंसार डट कमले नयाँ बालगीत ‘एउटी सुन्दर परी’ सार्वजनिक गरेको छ ।

बालसंसारको आधिकारिक युट्युब र फेसबुक च्यानलमार्फत आइतबार सार्वजनिक गरिएको उक्त गीतले बालबालिकालाई रमाइलोसँगै कल्पनाशीलताको संसारमा लैजाने विश्वास गरिएको छ ।

गीतमा शब्द– कल्पना श्रेष्ठ, सङ्गीत– आश्मा अर्याल, स्वर– इभाना श्रेष्ठ र एरेन्ज– राम कार्कीको रहेको छ । गीतकाे भिडियाे संयाेजन अनित व्यञ्जनकारले गर्नुभएकाे छ ।

बालमनोविज्ञानअनुकूल शब्द तथा मिठासपूर्ण धूनमा तयार भएको गीतले साना बालबालिकालाई सिक्दै रमाउने र मनोरञ्जन प्रदान गर्ने उद्देश्य बोकेको छ।

‘एउटी सुन्दर परी’मा परीकथाको रमाइलो शैलीलाई आधुनिक र आकर्षक प्रस्तुतिसँग जोडिएको छ ।

रंगीन दृश्य, सरल शब्द र मधुर आवाजको संयोजनले बालबालिकालाई गीतसँगै नाच्न–गाउन उत्प्रेरित गर्ने अपेक्षा गरिएको छ।

बालसंसारले आगामी दिनमा बालसाहित्य, बालगीत, एनिमेसन र सिकाइसम्बन्धी सामग्रीलाई थप समृद्ध बनाउँदै निरन्तर उत्पादन गर्ने प्रण गरेको छ।