मिस्टिक माउन्टेन ओपन टेनिसमा प्रदीप र शिभाली च्याम्पियन

नेपाल नम्बर वान प्रदीप खड्का र शिभाली गुरुङले होटल मिस्टिक माउन्टेन ग्रान्ड ओपन टेनिस प्रतियोगिताको सिंगल्स उपाधि शनिबार जित्नुभएकाे छ । प्रदीप पुरुष तथा शिभाली महिलामा च्याम्पियन बन्नुभएकाे हाे ।

सातदोबाटोस्थित टेनिस कोर्टमा भएको पुरुष फाइनलमा प्रदीपले प्रणव मानन्धरलाई ६–३, २–६ र ६–२ ले पराजित गर्दै करियाको १७ औं सिंगल्स उपाधि चुम्नुभयाे । डबल्समा उहाँले ९ उपाधि हात पार्नुभएकाे छ । राजवीर प्रधान र निसान श्रेष्ठ तेश्रो हुनुभयाे ।

नेपाल टेनिस संघको सहयोगमा होटल मिस्टिक माउन्टेनद्वारा आयोजित प्रतियोगिताको महिला फाइनलमा शिभालीले स्वस्तिका विष्टलाई ६–० र ६–२ ले हराउँदै यु–१६ सिंगल्सको फाइनलमा स्वस्तिकासँग व्यहोरेका हारको बद्ला लिनुभयाे ।

सिनियरमा शिभाली समग्र दोश्रोपटक च्याम्पियन बन्नुभएकाे हाे । प्रकृति श्रेष्ठ र सुनियर थापा तेश्रो बन्नुभयाे ।

पुरुष\महिला सिंगल्समा पहिलो हुनेले ४० हजार, दोश्रोले २० हजार र तेश्रोले ५\५ हजार नगद पुरस्कार हात पार्नुभयाे ।

यु–१२ ब्वाइज सिंगल्समा विश्वविशेष डल्लाकोटी पहिलो हुनुभयाे । उहाँले फाइनलमा वेदान्त चालिसेलाई ७–५ र ६–४ ले हराउनुभयाे । सोही स्पर्धाको गर्ल्समा सारा पन्त पहिलो हुनुभयाे । दोहोरो स्वर्ण जित्नुभएकी सारा यु–१४ सिंगल्समा पनि पहिलो हुनुभयाे । साराले फाइनलमा एरा खत्रीलाई ६–२ र ६–० को सोझो सेटमा पाखा लगाउनुभयाे ।

यु–१४ ब्वाइज सिंगल्समा साङ्गे रोकायाले फाइनलमा वेदान्तलाई सीधा सेटमा ६–२ र ६–२ ले पन्छ्याउँदै स्वर्ण चुम्नुभयाे ।

सिंगल्सको यु–८ ब्वाइजमा सर्वज्ञजंग खत्री र गर्ल्समा स्वर्णिमा श्रेष्ठ, यु–९ र यु–१० को ब्वाइजमा कायान चालिसे र गर्ल्समा निम्ति कुँवर तथा यु–१६ ब्वाइज सिंगल्समा दर्शिल श्रेष्ठले पहिलो स्थान हात पार्नुभएकाे थियाे ।

विजेतालाई नेपाल टेनिस संघका अध्यक्ष मनोहरदास मुल, होटल मिस्टिक माउन्टेनका अध्यक्ष बालकृष्ण ध्वजुलगायतले एक कार्यक्रमबीच पुरस्कृत गर्नुभयाे ।

पाँचदिने प्रतियोगिताको पुरुषमा १ सय ३६ र महिलामा ८३ खेलाडी सहभागी हुनुभयाे ।

जुनियर टेनिस इनिसिएटिभ (जेटीआई) को संयोजनमा भएको प्रतियोगिताको कुल पुरस्कार राशी २ लाख ४२ हजार रुपैयाँ रहेको छ ।

प्रतियोगितामा विभिन्न १४ स्पर्धामा प्रतिस्पर्धा भएको प्रतियोगिता संयोजक सूर्यभूषण वज्राचार्यले जनाउनुभएकाे छ ।