'जेनजीसँग निःशुल्क सेयरकाे सहमति भएकाे छैन'

भोटेकोसी पावर कम्पनी प्रालिले जेनजीसँग निःशुल्क सेयर दिने सहमति नभएको स्पष्ट पारेको छ ।

कम्पनीले भोटेकोसी जेनजी पब्लिक इन्भेस्टमेन्ट पब्लिक लिमिटेडसँग निःशुल्क सेयर वितरण गर्ने कुनै प्रकारको सहमति नभएको स्पष्ट पारेको हो ।

कम्पनीले बुधवार एक विज्ञप्ति जारी गर्दै भनेको छ, ‘भोटेकोसी जेनजी पब्लिक इन्भेस्टमेन्ट पब्लिक लिमिटेड र भोटेकोसी पावर कम्पनीबीच निःशुल्क सेयर दिने कुनै पनि प्रकारको सहमति भएको छैन ।’    

कम्पनीका अनुसार जेनजी पब्लिक इन्भेस्टमेन्टले भोटेकोसी पावर कम्पनीकाे १० प्रतिशत सेयर खरिदका लागि आवेदन दिने तयारी गर्दै छ । जसअन्तर्गत जलविद्युत् आयोजनाबाट प्रत्यक्ष प्रभावित स्थानीय जनतालाई उक्त कम्पनीको सेयर धनी बनाइनेछ ।

कम्पनीले प्रतिसेयर अङ्कित मूल्य १०० का दरले १० प्रतिशत सेयर त्यस कम्पनीलाई बिक्री गर्ने व्यवस्था मिलाएको छ । ‘यसरी सेयर खरिद गर्ने व्यवस्था निःशुल्क सेयर वितरण होइन, त्यसैले यस विषयमा भ्रममा नपर्न अनुरोध गर्छ,’  कम्पनीले भनेको छ ।