भारतमा २० बालबालिकाको मृत्युपछि कफ सिरप उत्पादन गर्ने कम्पनीका मालिक पक्राउ

भारतको मध्य प्रदेशमा कफ सिरप सेवनबाट २० बालबालिकाको मृत्यु भएपछि उत्पादक कम्पनीका मालिकलाई प्रहरीले पक्राउ गरेको छ ।

मध्य प्रदेश प्रहरीले तमिलनाडुको कांचीपुरमस्थित स्रेसन फार्माका मालिक एस‍. रंगनाथनलाई पक्राउ गरेको हाे । यो कम्पनीले उत्पादन गरेको कोल्ड्रिफ नामक खोकीको सिरप सेवनबाट मध्यप्रदेशका २० जना बालबालिकाको मृत्यु भएको प्रहरीले जनाएको छ ।

छिन्दवाडाबाट गएको एसआईटीको टोलीले स्रेसन फार्माका मालिक रंगनाथनलाई पक्राउ गरेको हाे ।

छिन्दवाडामा कफ सिरप सेवन गर्दा बालबालिकाकाे मृत्यु भएपछि अक्टोबर ५ मा १२ सदस्यीय विशेष अनुसन्धान टोली गठन गरिएको थियो। सेप्टेम्बर ७ देखि परासियामा धेरै बालबालिकाको एकपछि अर्को मृत्यु भइरहेको छ । यसपछि २३ सेप्टेम्बरमा अधिकारीहरूले मृत्युको अनुसन्धान सुरु गरेका थिए ।

खोकीको सिरप खाएपछि बालबालिकाहरूको मिर्गौला फेल भएर मृत्यु भइरहेको अनुसन्धानबाट खुलेको थियो ।

तमिलनाडु औषधि नियन्त्रण विभागको एक प्रतिवेदनले यस कम्पनीको सिरपको एक ब्याचमा ४८.६ प्रतिशत डाइथिलिन ग्लाइकोल रहेको पत्ता लगाएको छ । जुन ‘विषाक्त’ रसायन हो । यसले पहिले गाम्बिया, उज्बेकिस्तान र भारतमा बाल मृत्यु निम्त्याएको छ।

मध्य प्रदेश औषधि नियन्त्रण विभागले ४ अक्टोबरमा खोकीको सिरपमा प्रतिबन्ध लगाएको थियो । 

(बिबिसीकाे सहयाेगमा)