शिक्षामन्त्रीकाे निर्देशन– सामुदायिक विद्यालयमा कम्प्युटर शिक्षकको दरबन्दी थप्नू

शिक्षामन्त्री महावीर पुनले सामुदायिक विद्यालयमा कम्प्युटर शिक्षकको दरबन्दी थप्ने निर्णय गर्नुभएकाे छ । मन्त्री पुनले सामाजिक सञ्जालमार्फत दिनुभएकाे जानकारीअनुसार मंगलबार कम्प्युटर शिक्षकको दरबन्दी थपलगायत तीनवटा निर्णयहरु भएका छन् ।

मन्त्रालयमा उठेका र काम तुरुन्त अगाडि बढाउन निर्देशन दिइएका ३ वटा काम  निम्न छन् :

१) देशभरका सामुदायिक माध्यमिक विद्यालयमा पढ्ने विद्यार्थी कम्प्युटर शिक्षाबाट बञ्चित नहुन् भन्ने उद्देश्यले पठनपाठनका लागि हरेक विद्यालयमा एक जना कम्प्युटर शिक्षकको दरबन्दी अनिवार्य थप्नु पर्ने ।

२) केही विश्वविद्यालयले परीक्षा लिएर परीक्षाफल निकाल्न ८ महिनादेखि १ वर्षसम्म लगाउँदा रहेछन् । विद्यार्थीहरुका लागि त्यो अपुरणिय क्षति हो । त्यसैले विश्वविद्यालयलाई बढीमा ३ महिनाभित्र अनिवार्य रूपमा परीक्षाफल निकाल्न निर्देशन दिने । समयमै परीक्षाफल ननिकाल्ने विश्वविद्यालयको अनुदान रोक्का गरिदिने । राष्ट्रिय परीक्षा बोर्डले १२ कक्षाका ५ लाख विद्यार्थीको परीक्षाफल ३ महिनाभित्रै निकाल्दाे रहेछ ।

३) त्रिभुवन विश्वविद्यालय कीर्तिपुरको हाताभित्र ठूलो क्षेत्रफलमा रहेको झाडी फाँडेर (ठूला रुख नकाट्ने) सफा गरी सुन्दर बँगैचासहित फुटपाथ बनाएर विश्वविद्यालयलाई आकर्षक बनाउने ।