शिक्षा विधेयककाे विराेधमा शिक्षक महासंघद्वारा आन्दाेलन घाेषणा

विद्यालय शिक्षा विधेयकमा असन्तुष्टि जनाउँदै शिक्षक महासंघले आन्दोलन घोषणा गरेको छ ।

महासंघले शुक्रबार काठमाडाैंमा पत्रकार सम्मेलन गर्दै ११ गतेदेखि विधेयकको विरोधमा देशभर सडक आन्दोलन सुरू गर्ने जनाएको हो ।

महांसघले ९ गते प्रधानमन्त्री, शिक्षामन्त्री, सबै राजनीतिक पार्टीको दलहरु, विभिन्न समितिका सभापतिहरुलाई भेटेर ध्यानाकर्षण गर्ने जनाएको छ । सोही दिन दुई घण्टा धर्ना गर्ने, शुक्रबार सबै पालिकामा र १५ गते सबै जिल्लाको सम्वय इकाइमा ध्याकर्षण पत्र बुझाउने र २१ गते दोस्रो चरणको कार्यक्रम सार्वजनिक गर्ने महासंघले जनाएको छ ।

संसदको शिक्षा, स्वास्थ्य तथा सूचना प्रविधि समितिले पारित गरेको विद्यालय शिक्षा विधेयक आफूसँग भएकाे सहमतिअनुसार नरहेको महासंघको ठहर छ ।

प्रस्तावित विधेयक सहमतिअनुसार नभएकाले तत्काल फिर्ता गर्न र २०७५, २०७८, २०८० र २०८१–०८२ सालमा सरकारसँग भएको सहमति कार्यान्वयन गर्न महासंघले माग गरेको छ ।

२०८२ वैशाख १७ गते मन्त्रिपरिषद्‍बाट पारित भएका ९ बुँदा समेत अझै कार्यान्वयन नभएको महासंघले जनाएको छ ।

अस्थायी प्रकृतिका शिक्षकको पदपूर्ति ७५ प्रतिशत आन्तरिक प्रतिस्पर्धा र २५ प्रतिशत खुलाबाट हुनुपर्ने माग महासंघको छ । विधेयकमा ६० प्रतिशत आन्तरिक र ४० प्रतिशत खुलाबाट गर्ने प्रावधान राखिएको छ ।

विधेयकमा स्थायी शिक्षकको आवधिक बढुवाको प्रबन्ध समावेश नभएको र अस्थायी अवधिको गणना नभएको महासंघले जनाएको छ ।

म्याद सकिएका अध्यापन अनुमतिपत्रको म्याद थप्ने कुरा नसमेटिएको र शिक्षकको विभागीय कारवाहीको व्यवस्था सहमतिअनुसार नभएको महासचिव तुलाबहादुर थापाले बताउनुभयाे ।

विद्यालय कर्मचारीको पद र वेतन सुनिश्चित नभएको,  बालकक्षा शिक्षकको पद र सेवा–सुविधा निश्चित नभएको, संस्थागत विद्यालयका शिक्षकको सेवा र अव्यfवहारिक सरुवा प्रणालीको व्यवस्था ल्याइएको र शिक्षक दरबन्दी स्थानीय तहमा हस्तान्तरण गर्ने प्रावधान राखिएकाेमा महासंघकाे आपत्ति छ ।

‘शिक्षकलाई राष्ट्रिय क्याडरबाट स्थानीय क्याडरमा रुपान्तरण गर्ने षडयन्त्र भएकाे छ,’ महासचिव थापाले भन्नुभयाे ।

सम्बोधन हुन छुटेका सबै विषय सहमति अनुसार प्रतिवेदनमा समावेश गर्न र प्रतिनिधि सभामा पेश गर्न महासंघले सरकारसँग माग गरेको छ ।