विद्यालय शिक्षा विधेयक संसदीय समितिबाट पारित

विद्यालय शिक्षा विधेयक संसदीय समितिबाट पारित भएको छ ।

प्रतिनिधिसभाअन्तर्गत शिक्षा, विज्ञान तथा प्रविधि समितिको बैठकले बिहीबार विधेयक पारित गरेको हो । विधेयकमा राखिएका केही प्रावधानमा सरोकारवालाहरूले विमति जनाएपछि पारित हुन सकेको थिएन ।

विधेयकमा माओवादी, रास्वपा र राप्रपाले फरक मत राखेका छन् । माओवादीका देवेन्द्र पौडेल, रेखा शर्मा, ज्ञानु बस्नेत र महिन्द्रराय यादव, रास्वपाका सुमना श्रेष्ठ र राप्रपाका बिना जैसवालले फरक मत राख्नुभएकाे हाे ।

लामो समयदेखि विवाद हुँदै आएको आवासीय विद्यालयमा छात्रवृतिको विषय समितिले टुंगो लगाएको छ । जसमा सरकारले साढे २ प्रतिशत छात्रवृति प्रस्ताव गरेकोमा ३ प्रतिशतमा सहमति भएको छ ।

यसबीचमा उपसमिति नै बनाएर सहमति जुटाउने गरी पटकपटक प्रतिवेदन तयार गरिएको थियो तर पारित हुन सकेको थिएन । शिक्षा विधेयकका केही प्रावधानलाई लिएर निजी विद्यालय सञ्चालकहरूले बिहीबारबाटै आन्दोलनसमेत थालेका छन् ।

विधेयक आगामी प्रतिनिधिसभा बैठकमा पेश गर्ने समितिका सभापति अम्मरबहादुर थापाले जानकारी दिनुभयाे । उहाँका अनुसार उक्त विधेयक समितिमा करिब ९ महिनाअघि २०८१ मंसिरमा आएको थियो ।