बाबाप्रति समर्पित बालसंसारकाे नयाँ बालगीत सार्वजनिक (भिडियाे)

 

बालसंसार डट कमकाे बालसंगीत यात्रामा अर्को महत्वपूर्ण प्रस्तुति थपिएको छ ।

बुवाको मुख हेर्ने दिनलाई लक्षित गरी तयार पारिएको चौथो बालगीत आइतबार औपचारिक रूपमा सार्वजनिक गरिएको छ । यो गीत विशेषगरी बाबाप्रति कृतज्ञता र स्नेह प्रकट गर्ने उद्देश्यले सिर्जना गरिएको हाे ।

यस बालगीतको रचना ललिता ‘दोषी’ले गर्नुभएको हो भने स्वर अनमोल सेवाले दिनुभएको छ । कक्षा सातमा अध्ययनरत अनमाेलले आफूलाई बालगायकका रूपमा स्थापित गर्दै आउनुभएकाे छ । संगीतकार बद्री सेवाद्वारा सिर्जित धुनमा गीतलाई आधुनिक बालसंगीतको स्वाद दिने गरी प्रस्तुत गरिएको छ । एरेन्ज तथा मिक्सिङ राम कार्कीले गर्नुभएको छ भने रेकर्डिङ थापागाउँस्थित ‘द पिक रेकर्डिङ स्टुडियो’मा गरिएको हो ।

गीतको विशेषता भनेकै यसले राष्ट्रिय स्तरमै मान्यता पाएको पृष्ठभूमि हो । रेडियो नेपालद्वारा आयोजित राष्ट्रव्यापी बालगीत प्रतियोगिता २०८१ मा यो गीतले प्रथम स्थान हासिल गरेको थियो । प्रतियोगितामा विजयी भएपछि यसलाई अझ परिष्कृत गर्दै बालसंसार डट कममार्फत सार्वजनिक गरिएको हो । रचनाकार 'दाेषी'को भनाइमा, गीतले केवल बालबालिकामाझ मात्र होइन, अभिभावकमाझ पनि बाबाप्रतिको माया र सम्मानलाई उजागर गर्नेछ ।

बुवाको मुख हेर्ने दिनलाई नेपाली समाजमा विशेष भावनासहित मनाइन्छ । यस अवसरमा बाबाप्रति समर्पित भक्ति, श्रद्धा र सम्झनाका कार्यक्रम हुने गर्छन् । बालसंसार डट कमले सार्वजनिक गरेको यो गीत त्यही अवसरलाई अझ अर्थपूर्ण बनाउन सहयोगी बन्ने विश्वास गरिएको छ । गीतका शब्द र धुन दुवै बुबाको भूमिका, माया र परिश्रमलाई उजागर गर्ने खालका छन् ।

बालसंसार डट कमले यसअघि पनि बालबालिकाका लागि विविध बालगीत र सिर्जनाहरू सार्वजनिक गर्दै आएको छ । याे गीत बालसंसारकाे युट्युब र फेसबुक च्यानलमा हेर्न र सुन्न सकिनेछ ।