तिउरी लाइदिन् आमाले (बालकविता)

उरुङ बनाई पातक‍ो
मर्‍याकमुरुक मिचेर
आँख्ला डाँठ निकाली
सिलौटामा थिचेर 
हत्केलामा फिँजाई 
सुत्ने बेला रातमा
तिउरी लाइदिन् आमाले
          दाहिने हातमा ।

रातो पार्न मेरो हात
बज्यैसित सोधेर
तिउरीसँगै पिनिछन्
मकरकाँची खोजेर
मुड्की पार्दै घुसार्दै 
कर्कलाको पातमा
तिउरी लाइदिन् आमाले
          देउरे हातमा ।

झुम्रो कस्दा मुठीमा 
पूरै अ‍ौँला छेकियो
हेर्दाहेर्दै आफ्नै हात 
भकुन्डोझैँ देखियो
नमिल्ने भो कोट्याउन 
सिन्का हाली दाँतमा
तिउरी लाइदिन् आमाले
          दुइटै हातमा ।

---

                     - भोर्लेटार, लमजुङ 

[साउने सङ्क्रान्तिको रातमा आमाले आफ्ना छोराछोरीको हातमा तिउरी (तिग्रे) पिनेर लगाइदिने पुरानो प्रचलनलाई आधार बनाएर लेखिएको]