एसईईमा ४ जिपिए ल्याएकी गाेमालाई मीनबहादुर गुरुङकाे सम्मान

भक्तपुरको एक इँटाभट्टामा काम गर्दै अध्ययन गरेर २०८१ सालकाे एसईईमा ४ जिपिए ल्याउन सफल गाेमा श्रेष्ठकाे अध्ययनमा भाटभटेनी समूहका अध्यक्ष तथा समाजसेवी मीनबहादुर गुरुङले सहयाेग गर्नुहुने भएकाे छ ।

गोमाको बारेमा सञ्चारमाध्यममा समाचार सार्वजनिक भएपछि गुरुङ दम्पतीले एमबीबीएस तहसम्मको अध्ययन गराउने बचन दिनुभएकाे हाे । गोमालाई बिहीबार भाटभटेनीस्थित आफ्नै कार्यालयमा बोलाएर अध्यक्ष गुरूङ  र श्रीमती सावित्री गुरूङले एक लाख रुपैयाँ नगद, एउटा ल्यापटप र सम्मानपत्रसहित सम्मान गर्नुभएकाे छ ।

गुरूङले गोमालाई ११ र १२ कक्षाको अध्ययन आफ्नै खर्चमा गराउने र त्यसपछि एमबीबीएस तहसम्मको अध्ययनका लागि सहयोग गर्ने बचन दिनुभएकाे छ ।

चाँगुनारायण नगरपालिका–८ स्थित सुडालको एक इँटाभट्टामा बस्ने गोमाले बिहान बेलुकी इँटा सुकाउने काममा सहयोग गर्दै आउनुभएकाे थियाे ।

गाेमाले डाक्टर बन्ने चाहना राखेको बताएपछि भाटभटेनी समूहका अध्यक्ष तथा व्यवसायी गुरूङले एमबीबीएस तहसम्मको अध्ययन खर्च बेहोर्ने प्रतिवद्धता जनाउनुभएकाे हाे ।