गर्मीले विद्यार्थी बिरामी

तराईका जिल्लामा अत्यधिक गर्मीले पठनपाठन प्रभावित हुन थालेकाे छ ।

कतिपय विद्यालयले बिहानकाे कक्षा सञ्चालन गर्न थालेका छन् भने कतिपयले बिदासमेत दिन थालेका छन् । 

धनुषा र बाराको कलैया उपमहानगरपालिका वडा न १० स्थित मटिअर्वा माविमा गर्मीका कारण विद्यार्थीमा रिंगटा लाग्ने, चक्कर आउने जस्ता समस्या देखिन थालेको छ ।

४/५ जना छात्रछात्रालाई विद्यालय नर्सबाट उपचारपछि घर पठाइएको छ ।

तराईका जिल्लामा तापक्रम ४० डिग्री सेल्सियससम्म मापन गरिएको छ । गर्मी धान्न नसकिने अवस्था देखिएकाले कलैया उपमहानगरपालिकाले सामुदायिक र संस्थागत विद्यालय तीन दिन बन्द गरेको छ ।

कलैयाका शिक्षा, युवा तथा खेलकुद महाशाखा प्रमुख राजीवकुमार यादवले एक सूचना जारी गर्दै बुधबारदेखि आइतबारसम्म तीन दिन सामुदायिक र संस्थागत सबै विद्यालय बन्द रहने जनाउनुभएकाे छ ।

केही विद्यालयहरुमा वर्षे बिदाबाट कट्टा हुनेगरी विद्यालयहरु तीन दिन बन्द गरिएको सूचनामा उल्लेख छ ।

यस्तै धनुषाको सबैला नगरपालिका- २ स्थित श्रीराम प्रसाद माध्यमिक विद्यालयका २० जनाभन्दा बढी बालबालिका  गर्मीकै कारण मुर्छित भएका छन् । ती विद्यार्थीलाई अस्पतालमा भर्ना गरिएको छ ।

पर्साको पोखरिया नगरपालिकाले पनि विद्यालयहरुमा गर्मी बिदा दिएको छ । पोखरियाका मेयर प्रदुमनप्रसाद चौहानले बढ्दो अत्यधिक गर्मीका कारण बालबालिकाको स्वास्थ्यमा पर्नसक्ने प्रतिकूल असरलाई मध्यनजर गर्दै सामुदायिक र संस्थागत विद्यालयहरु तीन दिन बन्द गरिएको सूचना जारी गर्नुभएकाे हाे ।