शिक्षकका माग पूरा, आन्दाेलन फिर्ता

सरकारसँग ९ बुँदे सहमति भएसँगै शिक्षकहरुकाे एक महिना लामो सडक आन्दोलन फिर्ता भएको छ ।

शिक्षामन्त्री रघुजी पन्तसँग बुधबार शिक्षक प्रतिनिधिहरुले सहमति गरेका थिए । सहमतिका विषयलाई बुधबारै मन्त्रिपरिषदले पारित गरिसकेकाे छ ।

आन्दोलनका सबै कार्यक्रम स्थगित भएपछि विद्यालयहरुमा बिहीबारबाटै विद्यार्थी भर्ना सुरु हुँदै छ ।

नेपाल शिक्षक महासंघकाे नेतृत्वमा चैत तेस्राे साताबाट आन्दाेलन सुरु भएकाे थियाे ।

शिक्षक कर्मचारीमैत्री शिक्षा ऐन जारी गराउन महासंघले देशभरका सबै विद्यालय बन्द गरेर काठमाडौंमा सडक आन्दोलन थालेकाे थियाे ।

यो अवधिमा एसईईका उत्तरपुस्तिका परीक्षणसमेत राेकिएकाे छ भने कक्षा १२ काे परीक्षा स्थगित भएर वैशाख २१ बाट गर्ने गरी नयाँ मिति तय भइसकेकाे छ ।