अन्तत: कक्षा १२ काे परीक्षा सर्‍यो, वैशाख २१ बाट गर्ने निर्णय

राष्ट्रिय परीक्षा बोर्डले कक्षा १२ काे परीक्षा १० दिन सार्ने निर्णय गरेकाे छ ।

शिक्षा सचिव दीपक काफ्ले र बाेर्डका अध्यक्ष महाश्रम शर्माले मंगलबार साँझ प्रधानमन्त्री केपी ओलीसँग छलफल गरेलगत्तै बसेकाे बाेर्डकाे बैठकले वैशाख २१ गतेदेखि परीक्षा गर्ने निर्णय गरेको हाे ।

शिक्षक महासंघले चैत तेस्राे सातादेखि गरेकाे काठमाडौं केन्द्रित आन्दोलनका कारण परीक्षा हुने नहुने अन्याेल रहेकाे थियाे । अन्याेलकै बीच बाेर्डले मंगलबार बिहान मात्रै निजामती कर्मचारी खटाएर भए पनि निर्धारित मितिमै परीक्षा गर्ने निर्णय गरेकाे थियाे । 

बाेर्डकाे निर्णयपछि महासंघले जबर्जस्ती परीक्षा नगर्न चेतावनी दिएकाे थियाे भने कतिपय केन्द्राध्यक्षहरुले राजीनामा दिएका थिए । 

त्यससँगै कर्मचारी ट्रेड युनियनले पनि शिक्षकका माग पूरा गरेर उनीहरुलाई नै परीक्षामा सामेल गराउनुपर्ने भन्दै विरोध जनाएपछि प्रधानमन्त्री केपी शर्मा ओलीले बोर्डलाई परीक्षा सार्न आग्रह गर्नुभएकाे थियाे ।