अस्ट्रेलिया र जापानमा तेक्वान्दो खेल्दै अदिश

नेपालका अदिश खड्काले जापान र अस्ट्रेलियामा हुने अन्तर्राष्ट्रिय ओपन तेक्वान्दो च्याम्पियनसिपमा प्रतिस्पर्धा गर्दै हुनुहुन्छ ।

यही अप्रिलमा जापान वाटा ओपन र मेमा अस्ट्रेलियामा गोल्ड कोस्ट ओपन तेक्वान्दोमा अदिशले पुरुष यु–१७ उमेर समूहको व्यक्तिगत पुम्सेमा प्रतिष्पर्धा गर्नुहुनेछ ।

जापानको ओसाकामा अप्रिल २५ देखि २७ तारिखसम्म जापान वाटा ओपन हुँदै छ । त्यसमा अदिशसँगै नेपालका अन्य खेलाडीले पनि प्रतिस्पर्धा गर्ने तयारी छ ।

मे ३ देखि ४ सम्म अस्ट्रेलियाको गोल्ड कोस्टमा गोल्ड कोस्ट ओपन हुनेछ । अदिश जापानबाटै अस्ट्रेलिया जानुहुनेछ ।

एक कार्यक्रमबीच आइतबार अदिश अध्ययनरत नामी इन्टरनेसनल कलेजले उहाँलाई बिदाइ गरेको थियो । जोरपाटीस्थित कलेजमा भएको कार्यक्रममा प्रिन्सिपल अनिशा पाण्डेलगायतले अदिशलाई बिदाइ गर्नुभएकाे थियाे ।

तेस्रो डान प्राप्त खेलाडी अदिशले यस च्याम्पियनसिपमा आफ्नो उत्कृष्ट प्रस्तुति दिँदै पदक जित्ने विश्वास लिनुभएकाे छ ।