शिशिर स्मृति सम्मान डा. सुमन कर्माचार्यलाई

३०औँ राष्ट्रिय छन्द दिवसको अवसरमा शिशिर घिमिरे स्मृति प्रतिष्ठानले बहुभाषिक कविता वाचन, स्रष्टा सम्मान तथा पुरस्कार वितरण कार्यक्रम आयोजना गरेको छ ।

प्रतिष्ठानका संरक्षक तथा बर्दिवास छन्द चौतारीका अध्यक्ष प्रेम घिमिरे ‘अग्नि कवच’को अध्यक्षता र मधेस प्रदेश सभा सदस्य शारदा थापाको प्रमुख आतिथ्यमा सम्पन्न कार्यक्रममा प्रा. डा. सुमन कर्माचार्यलाई शिशिर घिमिरे स्मृति प्रतिभा सम्मान–२०८१ द्वारा रु. १५,५५५ राशी सहित सम्मान गरिएको हो ।

कार्यक्रममा विशेष शारीरिक क्षमता भएका दुई विद्यार्थी– गरिमा परियार (जनता मावि गौरीडाँडा, कक्षा ८) र दिनेश महतो (जनता बहुमुखी क्याम्पस, चौथो वर्ष) लाई जनही रु. ५,५५५ का दरले छात्रवृत्ति वितरण गरिएको थियो । सो सहयोग जनवादी लेखक सङ्घ सितामढी (भारत) का कोषाध्यक्ष महमद कामरुदिन नदाफद्वारा प्रदान गरिएको हो ।

त्यसैगरी, मिना देवकोटाद्वारा जनता मावि बर्दिवासकी कक्षा १० की छात्रा सुस्मिता कट्वाललाई रु. २,५५५ छात्रवृत्ति प्रदान गरिएको थियो ।

कार्यक्रममा मधेस प्रदेशका सिरहा, सप्तरी, धनुषा, महोत्तरी, सर्लाही, रौतहट तथा कोशी प्रदेश अन्तर्गत उदयपुर र बाग्मती प्रदेशको रामेछाप, सिन्धुली जिल्लाबाट आएका साहित्यकारहरूको सहभागिता रहेको थियो ।

कार्यक्रममा विभिन्न भाषा र लयमा गीत, गजल, कविता वाचन गरिएको थियो । सहभागी सर्जकहरूलाई स्व. शिशिर घिमिरेकी आमाले प्रशंसा पत्र प्रदान गर्नुभएकाे थियाे ।

सम्मानित व्यक्तित्व प्रा. डा. सुमन कर्माचार्यले मोफसलमा रहेका सर्जकहरूलाई सम्मान गर्दै साहित्य सृजनामा उत्साहित बनाउने कार्यप्रति हार्दिक आभार प्रकट गर्नुभयाे ।