विद्यालय भर्ना अभियान सफल पार्न प्रधानमन्त्रीकाे आग्रह

प्रधानमन्त्री केपी शर्मा ओलीले शैक्षिक सत्र २०८२ को विद्यार्थी भर्ना अभियान सफल पार्न सबैलाई आग्रह गर्नुभएकाे छ ।

अभियान सफल बनाउन अभिभावक तथा सरोकारवालाको ठूलो भूमिका रहेको उहाँले बताउनुभयाे । नयाँ शैक्षिक सत्रमा विद्यार्थी भर्ना अभियान आजबाट सुरु भएकाे छ ।

प्रधानमन्त्री ओलीले सबै शिक्षण संस्थालाई उत्कृष्ट ज्ञान केन्द्रका रुपमा विकास गरी शिक्षालाई ‘समृद्ध नेपाल, सुखी नेपाली’ को राष्ट्रिय आकाङ्क्षा पूरा गर्ने माध्यम बनाउनुपर्नेमा जोड दिनुभयाे ।

अझै पनि नेपालमा निरपेक्ष गरिबीको रेखामुनि रहेको जनसंख्या २० प्रतिशत रहेको उल्लेख गर्दै उहाँले गरिबीलाई हटाउने पहिलो सर्त शिक्षा रहेकाे र बालबालिकालाई अब पनि विद्यालयबाहिर राख्न नसकिने बताउनुभएकाे छ । 

आधारभूत तहको खुद भर्नादरमा सुधार आएपनि विद्यार्थी टिकाउ दर बढाउन अझै मेहनत गर्नुपर्नेमा उहाँकाे जाेड छ ।

प्रधानमन्त्री ओलीले विद्यालय शिक्षा विधेयक २०८१ लाई छलफलसहित पारित गराउन सरकार प्रतिबद्ध रहेको बताउनुभएकाे छ ।