कालाे मास्क लगाएर शिक्षककाे प्रदर्शन

विद्यालय शिक्षा ऐन जारी गर्न माग गर्दै आन्दाेलनरत शिक्षकहरुले सोमबार कालो मास्क लगाएर प्रदर्शन गरेका छन् ।

चैत २० देखि काठमाडौं केन्द्रित प्रदर्शनमा उत्रिएका शिक्षकहरुले साेमबार माइतीघरदेखि बानेश्वरसम्म कालो मास्क लगाएर जुलुस निकालेका हुन् । 

यसअघि शिक्षकहरूले कहिले सडकमै सुतेर र कहिले सिठी फुकेर प्रदर्शन गर्दै आएका थिए ।

नेपाल शिक्षक महासंघको आह्वानमा काठमाडौं उपस्थित भएका शिक्षकहरुले ‘काठमाडौं जा‍औँ अभियान’ सहित बुधबारदेखि अनिश्चितकालीन शैक्षिक आन्दोलन थालेको हो । 

गुणस्तरीय विद्यालय शिक्षा, विद्यार्थी र शिक्षक कर्मचारीमैत्री अग्रगामी विद्यालय शिक्षा ऐन जारी गराउन राज्य पक्षलाई दबाब दिनका लागि आन्दोलन थालिएको महासंघको भनाइ छ । आन्दोलनमा आएका शिक्षक–कर्मचारी विद्यालय शिक्षा ऐन जारी नहुँदासम्म काठमाडौंबाट नफर्किने महासङ्घले जनाएको छ ।