शिक्षक महासंघद्वारा शैक्षिक हड्तालको घोषणा

नेपाल शिक्षक महासंघले चैत २५ गते साेमबारबाट शैक्षिक हड्तालको घोषणा गरेको छ ।

शिक्षक कर्मचारीमैत्री शिक्षा ऐन जारी गराउन चार दिनदेखि आन्दोलनरत महासंघले अब शैक्षिक हड्ताल घोषणा गरेको हो । देशभरका सबै विद्यालय बन्द गरेर काठमाडौंको सडक आन्दोलनमा सहभागी हुन महासंघले आह्वान गरेको छ ।

यो अवधिमा एसईईका उत्तर पुस्तिकासमेत परीक्षण नहुने महासंघले जनाएकाे छ । पठनपाठन, उत्तर पुस्तिका परीक्षण र नतिजा प्रकाशनलगायत सबै काम रोक्न महासंघले आह्वान गरेको छ ।

देशभरका शिक्षकले बुधबारदेखि पुनः काठमाडौंमा आन्दोलन सुरु गरेका हुन् । गत माघ २० देखि आन्दोलनमा रहेको महासंघले ‘काठमाडौं जा‍औँ अभियान’ सहित बुधबारदेखि अनिश्चितकालीन शैक्षिक आन्दोलन थालेको हो । 

गुणस्तरीय विद्यालय शिक्षा, विद्यार्थी र शिक्षक कर्मचारीमैत्री अग्रगामी विद्यालय शिक्षा ऐन जारी गराउन राज्य पक्षलाई दबाब दिनका लागि आन्दोलन गरिएको महासंघले जनाएकाे छ । आन्दोलनमा देशभरका शिक्षक र कर्मचारी सहभागी छन् ।