नयाँ शैक्षिक सत्रका लागि पाठ्यपुस्तक छपाइ सकियाे

जनक शिक्षा सामग्री केन्द्रले शैक्षिक सत्र २०८२ का लागि पाठ्यपुस्तक छपाइको काम सकिएको जनाएको छ । केन्द्रका अनुसार वैशाख १ देखि सुरु हुने नयाँ शैक्षिक सत्रका लागि पाठ्यपुस्तक छापिसकिएको हो ।

केन्द्रका प्रबन्ध निर्देशक यदुनाथ पौडेलका अनुसार ८ वटा क्षेत्रीय कार्यालय र केन्द्रबाट १४ जिल्लामा बिक्री वितरण गर्नेगरी पाठ्यपुस्तक पठाउने तयारी भइरहेकाे छ । 

कक्षा १, २ र ४ को पाठ्यपुस्तक निजी क्षेत्रले छापेको हाे भने कक्षा ३, ५ र ६ देखि १२ सम्मका पाठ्यपुस्तक जनक शिक्षाले छापेकाे हाे ।

केन्द्रकी सूचना अधिकारी पार्वती न्यौपानेका अनुसार यो वर्ष १ करोड ७९ लाख १२ हजार थान किताब छपाइ गर्ने लक्ष्य केन्द्रले लिएको थियो । जसमा १ करोड ६३ लाख ६६ हजार पुस्तक छपाइ भइसकेको छ । करिब २० हजार जति कक्षा ३ र ५ को किताब अघिल्लो वर्षको स्टक छ ।

यो वर्ष अतिरिक्त गणित, अर्थशास्त्र र कम्प्युटर साइन्सको नयाँ पाठ्यपुस्तक छापिएकाे छ ।