काठमाडाैं महानगरका शिक्षकले ५ महिनादेखि तलब पाएनन्

काठमाडौं महानगरपालिकाअन्तर्गत रहेका सबै सामुदायिक विद्यालयका शिक्षकले ५ महिनादेखि तलब पाएका छैनन् ।

महानगरपालिकाले शिक्षक कर्मचारीका तलबलगायत अन्य प्रशासनिक तथा शैक्षिक गतिविधिका लागि अत्यावश्यक रकमको भुक्तानी विगत केही महिनादेखि नगरेकाले शिक्षकले तलब नपाएको नेपाल शिक्षक महासंघ महानगर समितिले जनाएको छ ।

महासंघले महानगरपालिकाबाट रकम भुक्तानी नभएका कारण विद्यालय सञ्चालनमा समस्या परिरहेको भन्दै सोमबार महानगरको शिक्षा विभागलाई ६ बुँदे ध्यानाकर्षण पत्र बुझाएको छ ।

महासंघले शिक्षकका जायज माग र मुद्दा चैत्र १८ सम्ममा सम्बोधन नभए आन्दोलनमा जान बाध्य हुने चेतावनीसमेत दिएको छ ।

महासंघका अध्यक्ष राजेन्द्र अधिकारी, सहअध्यक्ष विराट चौलागाई र सचिव हेरम्बराज कँडेलसहित विभिन्न संघ संगठनका महानगरपालिका समितिले संयुक्त रुपमा ध्यानाकर्षण पत्र बुझाएका हुन् ।

महासंघले ध्यानाकर्षण पत्रको जानकारी महानगरपालिकाका प्रमुख बालेन्द्र साह र उपप्रमुख सुनिता डंगोललाई पनि गराएको छ ।