एसईईमा नक्कली परीक्षार्थी

रुपन्देहीको सिद्धार्थनगर नगरपालिका-८ मा रहेको परीक्षा केन्द्र लीलाराम न्यौपाने माध्यमिक विद्यालयमा परीक्षा दिँदै गरेको अवस्थामा नक्कली परीक्षार्थी फेला परेका छन् ।

विद्यालयका प्राचार्य रूपकुमार रायमाझीका अनुसार परीक्षा चलिरहेको बेला प्रवेशपत्रमा हस्ताक्षर गर्दा प्रवेशपत्रमा भएको तस्बिर र परीक्षार्थीको अनुहार नमिलेपछि सोधपुक्ष गर्दा नक्कली विद्यार्थी भएको पाइएको हो ।

तिलोत्तमा नगरपालिकास्थित शान्ति नमुना माध्यमिक विद्यालयमा ११ कक्षामा अध्ययनरत एक विद्यार्थी सिद्धार्थनगर नगरपालिकामा रहेको सु-संस्कृत माध्यमिक विद्यालयका विद्यार्थीको परीक्षा दिनका लागि आएको भेटिएकाे हाे ।

ती विद्यार्थीको ग्रेड वृद्धिको परीक्षामा नक्कली परीक्षार्थी सहभागी भएका हुन् । नक्कली परीक्षार्थी प्रयोग भएको पाइएपछि ती विद्यार्थीलाई जिल्ला प्रहरी कार्यलय रुपन्देही पठाइएको थियाे ।

अन्यत्र भने एसईईको पहिलो दिनको परीक्षा मर्यादित र शान्तिपूर्ण तरिकाले सम्पन्न भएको छ ।

जिल्लाका ६० वटा परीक्षा केन्द्रमा २३ हजार ६ सय ६० जना विद्यार्थी सहभागी रहेको शिक्षा विकास तथा समन्वय इकाइ रुपन्देहीका सूचना अधिकृत अम्बर केसीले जानकारी दिनुभयाे । परीक्षामा नियमिततर्फ १७ हजार ३ सय ३० मध्ये १७ हजार २ सय १७ जना विद्याथीहरु परीक्षामा सहभागी छन् ।

अपाङ्गता भएका १५ जना विद्यार्थीले कक्षा ९ का विद्यार्थीको सहयोगले परीक्षा दिएका छन् । साथै, कारागार र बालसुधार गृहबाट ८ जना विद्यार्थीहरु सहभागी छन् ।

त्यसैगरी कपिलवस्तुमा पहिलाे दिन ९१ विद्यार्थी अनुपस्थित भए । जिल्लाका १ सय ६७ विद्यालयका कुल ९ हजार ४६१ जना परीक्षार्थीले परीक्षा दिने तयारी थियाे ।

जिल्लामा ३ जना दृष्टिविहीन र एक जना शारीरिक अपाङ्गले समेत परीक्षा दिएका छन् । सूर्योदय मावि बरवामा, बाणगंगा मावि सिद्धिपुर बाणगंगा मावि लगईमा एक-एक जना दृष्टिविहीन  र दुधाधारी मावि गुगौलीमा एक जना अपांगसमेत परीक्षामा सामेल थिए ।