‘प्रेमसम्बन्ध बुबाआमाको जस्तो होस्, जुन अहिलेको जेनेरेसनमा छैन’

किशोर आवाजको १४ औं श्रृंखलामा हामीले रोजिना थोकर र ऋतिका लाम्गादेसँग कुराकानी गरेका छौं । उहाँहरु ललितपुरको ब्लुबर्ड कलेजमा कक्षा ११ मा अध्ययनरत हुनुहुन्छ । रोजिनाले होटल म्यानेजमेन्ट र ऋतिकाले बिजनेस स्टडिज पढिरहनुभएको छ । 

रोजिनालाई पढ्नबाहेक घुम्न र मोडलिङमा रुचि छ । त्यसका अलावा भलिबल खेल्न उहाँलाई मन पर्दो रहेछ ।

ऋतिकालाई मोडलिङ र अभिनय गर्न मन पर्छ । उहाँले ‘कमलो मन’ सिरियलमा अभिनय गरिरहनुभएको छ । चलचित्र खेल्ने अवसर आयो भने भावनात्मक खालका पात्रको भूमिका निभाउन उहाँलाई मन छ ।

रोजिनाको लक्ष्य क्याबिन क्रु बन्ने छ भने ऋतिकाको अभिनयमै जम्ने चाहना छ । रोजिनालाई घुमफिरमा बढी रुचि भएकाले विदेश जान मन छ । ऋतिकाचाहिँ केही वर्ष विदेशमा बसेर, धेरै कुरा सिकेर नेपालमै त्यसलाई लागू गर्न चाहनुहुन्छ ।

अहिलेको जेनेरेसनले प्रेमलाई कसरी बुझ्छ ? ‘हिजोआज प्रेमभन्दा पैसाले महत्व पाएको जस्तो लाग्छ,’ उहाँहरु भन्नुहुन्छ, ‘तर यसमा केयर, रेस्पेक्ट र टाइमको महत्व बढी हुन्छ ।’ उहाँहरु प्रेमसम्बन्ध आफ्ना बुबाआमाको जस्तो हुनुपर्ने बताउनुहुन्छ । 

दस वर्षपछि तपाईंहरुलाई कुन रुपमा देख्न पाइएला ? ऋतिका भन्नुहुन्छ, ‘म सफल कलाकारको रुपमा देखिन चाहन्छु ।’ रोजिना थप्नुहुन्छ, ‘मलाई चाहिँ दस वर्षपछि क्याबिन क्रुका रुपमा देख्न पाउनुहुनेछ ।’ 

ऋतिका र रोजिनाको विचारमा नेपाली समाजको सकारात्मक पक्ष भनेको एक–अर्कालाई गर्ने सहयोग हो भने पोशाक र खानपिन हेरेर गरिने मूल्यांकन नकारात्मक पक्ष हो । 

कुनै एउटा शक्ति हासिल गर्नुभयो भने के गर्नुहुन्छ ? भन्ने प्रश्नमा ऋतिका भन्नुहुन्छ– ‘म सबै व्यक्तिलाई रोजगारी उपलब्ध गराउने प्रयास गर्ने थिएँ ।’ रोजिना पनि बेरोजगारी हटाउन पहल गर्ने बताउनुहुन्छ । ‘त्यससँगै बलात्कारजस्ता जघन्य अपराध गर्नेहरुलाई कारवाही गर्न बलियो कानुन बनाउन पहल गर्ने थिएँ,’ उहाँ थप्नुहुन्छ ।

हाम्रो समाज र सामाजिक परिवेश नै किशोरकिशोरीका लागि सबैभन्दा चुनौतीपूर्ण बनेको उहाँहरु बताउनुहुन्छ । आफूजस्तै किशोरका लागि रोजिनाको सुझाव छ, ‘सकारात्मक बन्नु, आफूले गर्न सकेको काम गर्न प्रयास गर, अरुको कुरा नसुन र आफूलाई गर्न मन लागेको काम गर ।’ ऋतिकाचाहिँ कुनै पनि नराम्रो काममा नलाग्न र नराम्रो काम गर्नुअघि आफ्ना बाबाआमाको बारेमा सोच्नुपर्ने सुझाव दिनुहुन्छ । 

रोजिना र ऋतिकासँगको रमाइलो कुराकानी सुनौं भिडियोमा ।