मार्टिन लुथर किङ र डाेनाल्ड ट्रम्पकाे जस्तै भाषण शैली भएका आविष्कार

झापाको धुलाबारीस्थित होली बेल विद्यालयकाे २४ औं वार्षिकोत्सवका अवसरमा फागुन २९ गते एक विद्यार्थीले गरेकाे भाषण यतिबेला निकै चर्चामा छ ।

उक्त कार्यक्रममा कक्षा १० मा अध्ययनरत आविष्कार राउतले विद्यार्थीका तर्फबाट दिएकाे मन्तव्यलाई धेरैले मार्टिन लुथर किङ, डाेनाल्ड ट्रम्प र रेस्लर फाउल हेम्यानसँग तुलना गरेका छन् । 

सामाजिक सन्जालमा भाइरल बनेको साढे दुई मिनेटको  भिडिओमा राउतले देशमा पछिल्लो अवस्थामा देखिएको निराशालाई उजागार गर्नुभएकाे छ । उहाँले देशकाे समग्र समृद्धि र विकासका लागि युवाले भूमिका निर्वाह गर्नुपर्ने उद्घोष गर्नुभएकाे छ ।

राउतकाे भाषणका शब्दले भन्दा पनि उहाँकाे शक्तिशाली आवाज, हाउभाउ र शैलीलाई लिएर बढी प्रशंसा भइरहेकाे छ । 

आविष्कारले केही समयअघि मेचीनगरमै आयाेजित वक्तृत्वकला प्रतियाेगितामा ३० भन्दा बढी विद्यालयका विद्यार्थीलाई पछि पार्नुभएकाे थियाे । विद्यालयका अन्य अतिरिक्त क्रियाकलापमा पनि उहाँकाे अग्रसरता रहने गरेकाे छ ।

पढेर र युट्युबमा धेरै जनाकाे भिडियाेहरु हेरेर आफूले भाषण गर्न सिकेकाे आविष्कार बताउनुहुन्छ । 'मुख्य त पढाइ नै हाे, सँगसँगै धेरै जनाकाे भिडियाे हेरेँ र उहाँहरुबाट प्रभावित भएँ,' उहाँ भन्नुहुन्छ, 'काेही एक जनासँग प्रभावित भएकाे वा एकै जनाकाे शैली टिपेकाे जस्ताे लाग्दैन ।'

इन्टरनेटमा राम्राे कुरा र उपयाेगी विषय सिक्नमा समय बिताउनुपर्ने उहाँ बताउनुहुन्छ । आफ्नाे मन्तव्यमा केही निराशा देखिए पनि आफूले समाजको यथार्थ चित्रण गरेको र आफूजस्तै युवाको आवाज उठाएको उहाँले बताउनुभयाे ।