प्याब्सनले नेपालको शैक्षिक गुणस्तर निरन्तर राख्नेछ : अध्यक्ष अधिकारी

निजी तथा आवासीय विद्यालय अर्गनाइजेसन नेपाल (प्याब्सन) को १६औं राष्ट्रिय महाधिवेशनबाट कृष्ण अधिकारी अध्यक्ष पदमा सर्वसम्मत चयन हुनु भएको छ ।

काठमाडौंमा सम्पन्न महाधिवेशनले ७३ सदस्यीय कार्यसमिति चयन गरेको हो । प्याब्सनको विधानअनुसार ६६ जना निर्वाचित र ७ जना मनोनित गर्ने प्रावधान रहेको छ । निर्वाचित कार्यसमितिको सहअध्यक्षमा गोपाल आचार्य, वरिष्ठ उपाध्यक्ष दीपिका थापा हुनुहुन्छ ।

उपाध्यक्षहरू आशिष श्रेष्ठ, अनिलकुमार झा, किशोर गौतम, सन्तोषमणि न्यौपाने तथा रबिन शर्मा तथा भूगोलतर्फका उपाध्यक्ष टिकाराम ढकाल (कोशी), प्रेम शर्मा (गण्डकी), टिकाराम न्यौपाने (लुम्बिनी), नैनसिंह खत्री (कर्णाली) र ललितराज पन्त (सुदूरपश्चिम) निर्वाचित हुनु भएको छ ।

यसैगरी महासचिवमा आरबी कटवाल, उपमहासचिवद्वय भीमसेन केसी र भुवनलाल श्रेष्ठ, चार सचिवमा आशाकुमारी
खड्का, विष्णु न्यौपाने, जनक कार्की र यज्ञ हमाल हुनुहुन्छ । कोषाध्यक्ष गणेशबाबु पोखरेल र सहकोषाध्यक्षमा ग्रेस श्रेष्ठ र सन्तोष अधिकारी निर्वाचित हुनुहुन्छ । निर्वाचित कार्यसमितिलाई निवर्तमान अध्यक्ष डीके ढुंगानाले सफत खुवाउनु भएको थियो ।

प्याब्सनका नवनिर्वाचित अध्यक्ष अधिकारीले पदभार ग्रहण गरेसँगै शिक्षासम्बन्धी मुद्दालाई प्रभावकारी ढंगले उठाउने बताउनु भएको छ । ‘हाम्रो पहिलो प्राथमिकता भनेको शिक्षा विधेयक नै हो । शिक्षा विधेयकमा हाम्रो विद्यालयहरू कम्पनीमा रहनु पर्छ । २०५८ सालमा हामी कम्पनीमा आएका हो । यो आजीवन कम्पनीमा रहनु पर्छ भन्ने हाम्रो पहिलो मुद्दा हो ।’

उहाँले भन्नुभयो, ‘दोस्रो मुद्दा शिक्षा र करिक्युलमका बारेमा छ, गुणस्तरका बारेमा छ । हामीले गुणस्तरीय शिक्षा प्र्रदान गरिरहेका छौँ । प्राइभेट स्कुलको शिक्षाले नेपालको शिक्षाको गुणस्तर बढेको छ । यसलाई निरन्तर राख्न चाहन्छौं ।’

यसैगरी प्याब्सनका ५ हजार निजी विद्यालय सदस्यलाई शैक्षिक गुणस्तर कायम गराउन कटिवद्ध रहने उल्लेख
गर्नुभएको छ ।