आहार फेयरमा काबरा ग्रुपका सामानमा आकर्षण

भारतको दिल्लीस्थित प्रगति मैदानमा भारतकै सबैभन्दा ठूलो ट्रेड फेयर ‘आहार’ आयोजना गरिएको छ ।

मार्च ४ देखि ८ सम्म भव्यताका साथ भएको फेयरमा पहिलो पटक नेपालबाट सहभागी काबरा ग्रुपले क्वालिटी फुड एन्ड स्न्याक्स प्रालि, क्वालिटी फुड्स नेपाल प्रालि र क्वालिटी नुडल्स इण्डष्ट्रिज प्रालिका लोकप्रिय उत्पादनहरू बिस्कुट, स्न्याक्स तथा नुडल्सहरू राखेको थियो ।

फेयरमा आकर्षक रुपमा सिंगारिएको स्टलमा प्रदर्शित बिस्कुट, नुडल्स तथा स्न्याक्सहरू अवलोकनकर्ताको आकर्षणको केन्द्रमा थिए भने केटाकेटीदेखि युवा र प्रौढदेखि बृद्धबृद्धासम्मलाई सुहाउँदो बजारमूल्यमा नौलो स्वाद र आकर्षक प्याकेजिङका साथ प्रस्तुत गरेको ज्याकपट ब्राण्डका नुडल्स तथा स्न्याक्सहरूप्रति सर्वसाधारणदेखि उद्योगी व्यवसायीसम्मले उत्सुकता देखाउनुभएको थियो ।

फेयरमा भारतीय व्यवसायीहरूले प्रदेश र क्षेत्रगत सुपर डिष्ट्रिब्युटर्स, सोल डिष्ट्रिब्युटर्स र रिजनल डिष्ट्रिब्युटर्सका प्रस्तावनाहरू पेश गर्नुभयाे भने तेश्रो मुलुकबाट आएका व्यवसायीहरूले पनि डिष्ट्रिब्युटरका लागि आ–आफ्ना प्रस्तावहरू पेश गर्नुभएकाे थियाे ।

‘आहार’ ट्रेड फेयरमा प्राप्त भएको यो सफलताले प्रोत्साहित काबरा ग्रुपले आउँदो वर्ष अनुमानित २०० करोडमाथिको निर्यात गर्ने लक्ष्य राखेको छ । 

ग्रुपअन्तर्गतका बिस्कुट, स्न्याक्स तथा नुडल्स उद्योगहरू श्याम काबराका छोरा सिद्धार्थ काबरा र राजेश काबराका छोरा मिलिन्द काबराले सम्हालिरहनु भएको छ ।

उद्योगहरूको जिम्मेवारी सम्हालेको छोटो समयमै उहाँहरूले कारोवारमा दिनानुदिन बृद्धि गर्नुका साथै नुडल्स तथा स्न्याक्स सेगमेण्टमा काब्स ज्याकपटलाई भारतीय बजारमा स्थापित ब्राण्डको रुपमा ब्राण्डिङ गराउन सफल हुनुभएको छ । उहाँहरुले सार्क मुलुकका अन्य देशलगायत तेश्रो मुलुकमा आज पनि निर्यात गर्दै आइरहनुभएको छ ।