प्याब्सनको १६औं राष्ट्रिय महाधिवेशन सुरु

निजी तथा आवासीय विद्यालय अर्गनाइजेसन, नेपाल (प्याब्सन) को १६औं राष्ट्रिय महाधिवेशन काठमाडौंमा सुरु भएको छ । कमलादीस्थित प्रज्ञा भवनमा सोमबार सुरु भएको हो।

प्रधानमन्त्री केपी शर्मा ओलीले उद्घाटन गर्नु भएको हो । दुई दिने महाधिवेशनमा देशभरबाट १ हजार ५ सय २ जना प्रतिनिधिहरु सहभागी हुनुहुन्छ ।

प्रधानमन्त्री ओलीले निजी विद्यालयलाई माइनस गरेर अघि बढ्न नसकिने बताउनुभयाे । 'हाम्राे यात्रा समाजवादतर्फ हो, धनी हुन खोजेको हो, शिक्षा निशुल्क दिनुपर्छ,' प्रधानमन्त्री ओलीले भन्नुभयाे, 'हाम्रो प्राथमिकता शिक्षा क्षेत्र हो । सरकार  निजी क्षेत्रसँग पब्लिक प्राइभेट पार्टनसिप गर्न चाहन्छ ।'

प्रधानमन्त्री ओलीले निजी विद्यालयलाई पाँच वर्षभित्र गुठीमा लानुपर्ने प्रस्ताव कसरी आयो भनेर आफू छक्क परेको बताउनुभयाे ।

प्रधानमन्त्री ओलीले विद्यार्थीलाई देशभक्ति, स्वाधीनता, वीरताको इतिहास सिकाउन र अरुको दान दक्षिणामा भर नपरी आफ्नै पाखुरामा विश्वास गर्न पनि आग्रह गर्नुभयाे ।

प्याब्सनका अध्यक्ष डिके ढुंगाना र प्रधानमन्त्री ओलीले प्याब्सनका पुर्व अध्यक्षहरु भोजबहादुर शाह, लक्ष्यबहादुर केसी र विजय सम्बाहाम्फेलाई सम्मान प्रदान गर्नुभएको थियोे ।

यसैगरी पत्रकार नारायण किलम्बुलाई प्याब्सन पत्रकारिता पुरस्कार प्रदान गरिएको थियो ।

राष्ट्रिय महाधिवेशनले नयाँ कार्यसमिति चयन गर्नेछ ।