केपी ओली कपकाे फाइनल हेर्न इटालीका गाेलकिपर बफन नेपालमा (भिडियाे)

इटालीलाई विश्वकप जिताउनुभएका गोलकिपर जियानलुजी बफन ‘केपी ओली कप’ फुटबल प्रतियोगिताको फाइनल हेर्न नेपाल आउनुभएको छ । उहाँलाई राष्ट्रिय युवा संघका अध्यक्ष क्षितिज थेबेले आइतबार त्रिभुवन अन्तर्राष्ट्रिय विमानस्थलमा स्वागत गर्नुभयाे ।

युवा संघ नेपालको आयोजनामा जारी केपी ओली कप फुटबलको फाइनल फागुन १९ गते सोमबार हुँदैछ । फाइनलमा त्रिभुवन आर्मी क्लब र मच्छिन्द्र एफसी भिड्दैछन् ।

पाँच पटक विश्वकप खेल्नुभएका बफनले सन् २००६ मा इटालीलाई फिफा विश्वकप जिताउनुभएको थियो । इटालीबाट उहाँले ८० खेलमा कप्तानीसमेत गर्नुभएको थियो भने १ सय ७६ खेलको कीर्तिमानी खेल्नुभएकाे थियाे ।

फ्रान्सलाई पेनाल्टी सुटआउटमा ५–३ गोलअन्तरले पराजित गरेर आफ्नो देशका लागि चौथो पटक विश्वकप फुटबल उपाधि दिलाउनुभएका बफनको नेपाल आगमन नेपाली फुटबलको लागि महत्वपूर्ण उपलब्धि हो ।

आधुनिक फुटबलका उत्कृष्ट गोलरक्षकका रूपमा उहाँलाई जर्मनीको ओलिभर कानजत्तिकै दर्जामा राख्ने गरिन्छ । उहाँ क्लब फुटबलमा सन् २००१ मा ५२ मिलियन युरो लिएर कीर्तिमानी मूल्यमा युभेन्टसमा आबद्ध हुनुभएको थियो ।