‘स्वदेशमै स्वरोजगार बन्न र भविष्यमा आफ्नै ब्रान्ड स्थापित गर्न चाहन्छौं’ (भिडियाे)

किशोर आवाजको एघारौं श्रृंखलामा हामीले किरण भण्डारी र ईशा मानन्धरसँग कुराकानी गरेका छौं । 

उहाँहरु ललितपुरको लगनखेलस्थित नेस्फिल्ड इन्टरनेशनल कलेजमा होटल म्यानेजमेन्टमा ब्याचलर अध्ययनरत हुनुहुन्छ । उहाँहरुले आफ्नो पढाइ र त्यससँगैको सिकाइका अनुभवलाई विस्तृतमा बाँड्नुभएको छ । 

किरणले ११–१२ मा विज्ञान विषय पढेर ब्याचलरमा होटल म्यानेजमेन्ट पढ्नुभएको हो । ‘विज्ञान मेरो रुचिले पढेको थिइन, यो मेरो रुचिको विषय हो,’ उहाँले भन्नुहुन्छ, ‘होटल म्यानेजमेन्टको पढाइ रमाइलो लागेको छ ।’ ईशाले पनि कक्षा ११ र १२ मा फरक विषय पढेर अहिले हाेटल म्यानेजमेन्ट राेज्नुभएकाे हाे । उहाँ पनि रमाइलो मानेर पढिरहेको बताउनुहुन्छ ।

किरणलाई चिकेन आइटम बनाउन र ईशालाई बेकरी आइटम बनाउनमा रुचि छ । उहाँहरु दुवै जनाको योजना पनि भविष्यमा देशमै स्वरोजगार बन्ने र आफ्नै ब्रान्ड स्थापित गर्ने छ । ‘पढाइकै क्रममा इन्टर्न जाँदा विदेश र नेपालमा रहेका समानता र भिन्नता जान्ने मौका मिल्नेछ, त्यसपछि नेपाल फर्किएर बेकरी खोल्ने इच्छा छ,’ ईशा भन्नुहुन्छ । 

‘नेपालमा मात्रै नभएर, विदेशमा पनि गएर त्यहाँका विभिन्न सेफहरुसँग काम गर्न मन छ, म्यानेजमेन्ट कसरी चलाइँदो रहेछ भन्ने प्राक्टिकल्ली अनुभव गर्न मन छ,’ किरण भन्नुहुन्छ, ‘त्यसपछि फर्किएर आफैंले केही गर्ने र स्थापित हुने इच्छा छ ।’

घरमा खाना बनाउन कत्तिको अभ्यास गर्नुहुन्छ ? भन्ने प्रश्नमा ईशा भन्नुहुन्छ, ‘युट्युब र टिकटकमा बनाएको हेरेर धेरैपटक परिकार बनाएको छु तर त्यहाँ देखाएकै जस्तो चाहिँ बन्दैन ।’ 

होटल म्यानेजमेन्ट पढ्न चाहनेलाई ‘आफ्नो रुचि छ भने मात्रै यो विषय रोज्नुपर्ने’ किरणको सुझाव छ । 

किरणले पाँचतारे होटलहरुमा क्याजुअल स्टाफका रुपमा गएर काम गर्ने अवसर पनि पाउनुभएको छ तर ईशाले त्यस्तो अवसर पाइनसकेको बताउनुभयो । ‘त्यसक्रममा धेरै कुरा सिकिन्छ,’ किरण भन्नुहुन्छ ।

सुन्नुहोस्, उहाँहरुसँगको कुराकानी भिडियोमा ।