काभ्रेका विद्यार्थीलाई अभिनेत्रीकी छाेरीकाे सहयाेग

अमेरिकामा बस्दै आउनुभएकी अभिनेत्री जल शाह यतिबेला नेपालमा हुनुहुन्छ । पारिवारिक भ्रमण र काभ्रेका चार विद्यालयलाई सहयोग गर्न उहाँ साताअघि १६ वर्षीया छोरी कलश शाहसहित काठमाडौँ आउनुभएकाे हाे । 

आमा-छोरीले चौरी देउराली गाउँपालिकाको एक विद्यालयलाई विभिन्न शैक्षिक सामग्री प्रदान गर्नुभएकाे छ । कलशले विद्यालयमै पुगेर कपडा, सेनेटरी प्याड, झोला, खाद्यन्नलगायतका सामग्री हस्तान्तरण गर्नुभयाे ।

‘शिक्षा फाउन्डेशन’ नामक संस्था खोलेर शैक्षिक सहायत गर्दै आउनुभएकी कलशले आर्थिक अवस्था कमजोर भएका दुई विद्यार्थी करिश्मा मगराती र युनिक कोइरालालाई जनही ३५ हजार रुपैयाँसमेत प्रदान गर्नुभएकाे छ । 

तीन साताका लागि नेपाल आउनुभएकी कलशले अन्य तीन विद्यालयका विद्यार्थीलाई पनि शैक्षिक सामग्री वितरण गरिने बताउनुभएकाे छ ।

पछिल्लो समय नेपाली युवामा विदेश जाने लहर चलिरहँदा कलश भने स्वदेश फर्केर समाज सेवामा रमाएको देख्दा कतिपयले ‘उदाहरणीय काम’ भनेका छन् । एक शिक्षक भन्नुहुन्छ, ‘यसरी आफ्नो देशलाई सम्झिएर आउनु धेरै राम्रो हो ।’