‘पाइलट बन्न मन छ तर ड्रामा छाड्दैनौं’ (भिडियाे)

 

किशोर आवाजको सातौं श्रृंखलामा हामीले थिएटर सिकिरहनुभएका बालबालिकासँग कुराकानी गरेका छौं । उहाँहरू हुनुहुन्छ– मुन पौडेल र प्रस्तुतचन्द्र बराल । 

मुन काठमाडौंको बानेश्वरस्थित भ्याली भ्यु स्कुलमा कक्षा ८ मा र प्रस्तुत सिफलस्थित डियरवाक स्कुलमा कक्षा ६ मा अध्ययनरत हुनुहुन्छ ।

उहाँहरुले पढाइसँगै पिंगलास्थानमा छुनुमुनुमार्फत थिएटर कक्षा पनि सिकिरहनुभएको छ । दुवै जनाले थुप्रै नाटकमा अभिनय गरिसक्नुभएको छ । ‘मलाई ड्रामा गर्न र फुटबल खेल्न मन पर्छ,’ प्रस्तुत भन्नुहुन्छ । 

मुनलाई चाहिँ अभिनय र नृत्य गर्न मन पर्दोरहेछ । ‘कक्षा ६ मा हुँदादेखि मैले अभिनय सिक्न थालेको हुँ,’ मुन भन्नुहुन्छ । 

आफू कक्षा १ मा पढ्दा शिक्षक राजन भुजेलले आग्रह गरेपछि ड्रामा सिक्नका लागि कक्षा लिन थालेको प्रस्तुत बताउनुहुन्छ । छुनुमुनु भुजेलले स्थापना गर्नुभएको संस्था हो । 

मुनले सिरियस खालका पात्रको भूमिका धेरै निभाउनुभएको छ भने प्रस्तुतले सबैखालका पात्रको भूमिका निभाइसक्नुभएको छ । एक महिनाअगाडि भारतको कोलकातामा आयोजित नाटक महोत्सवमा देखाइएको ‘जुनेली’ नाटकमा पनि प्रस्तुतले अभिनय गर्नुभएको छ । मुनले गरेको पछिल्लो नाटकचाहिँ ‘छलाङ’ हो । 

‘छुनुमुनुमा जानुअघि अलि एकांकी खालको थिएँ, अहिलेचाहिँ सबैसँग घुलमिल गर्न सक्ने भएको छु, कन्फिडेन्स पनि बढेको छ,’ मुन भन्नुहुन्छ, ‘धैर्यता र आत्मविश्वास बढेको महसुस हुन्छ, पब्लिक रिलेसन पनि इम्प्रुभ भएको छ ।’

‘बालबालिकालाई नाटक सिकायो भने अनुशासनको लेभल नै अर्कै हुन्छ, पोजिटिभ भाइब्स आउन थाल्छन्,’ प्रस्तुतको अनुभव छ ।

मुन र प्रस्तुत दुवै जनाको लक्ष्यचाहिँ पाइलट बन्ने छ । उहाँहरू भन्नुहुन्छ, ‘तर ड्रामाचाहिँ छाड्दैनौं ।’ प्रस्तुतलाई पाइलटसँगै थिएटर प्रशिक्षक बन्न मन रहेछ ।

अभिनय र पढाइबाहेक प्रस्तुतलाई फुटबल खेल्न मन पर्दोरहेछ । मुनचाहिँ नृत्य गर्न मन पर्ने बताउनुहुन्छ । 

‘तपाईंहरुलाई केही वर्षपछाडि हामीले कुन रुपमा देख्न पाउँछौं ?’ यो प्रश्नमा मुन भन्नुहुन्छ, ‘पाइलट वा दक्ष थिएटर कलाकार ।’

‘मलाई चाहिँ एउटा राम्रो मान्छे, पाइलट र कलाकारका रुपमा हेर्न पाउनुहुनेछ,’ प्रस्तुत थप्नुहुन्छ ।