अष्टे्ेलिया गएकी शिक्षिकाकाे नाममा ३ लाख तलब निकासा

सिरहाकाे गाेलबजारस्थित जनता माध्यमिक विद्यालय (प्राविधिक) मा बेतलबी असाधारण बिदा बसेकी शिक्षिकाको तलबका नाममा तीन लाख हिनामिना भएकाे पाइएकाे छ । 

शिक्षिका विमला झा २०८१ जेठ १० देखि विद्यालयमा आउनुभएकाे छैन । बेतलबी असाधारण बिदा लेखेर छाेरी भेट्न अष्ट्रेलिया हिँड्नुभएकी उहाँकाे बिदा स्वीकृत पनि भएकाे छैन । 

शिक्षिका नआए पनि प्रधानाध्यापक भरत साहले उहाँको हाजिरी प्रमाणित गरेर नगर शिक्षा शाखामा पठाएकाे र नगरपालिकाले २०८१ असोजसम्मको तलब निकासा दिएकाे पाइएकाे हाे । प्रधानाध्यापक साहले हाजिरी रजिष्टरमा आफैँले हाजिरी गरिदिएकाे र विद्यालयबाट झाको तलब २ लाख ९६ हजार ३ सय ४५ रुपैयाँ ६३ पैसा निकासा लिएकाे खुलेपछि विद्यालयमा तरङ्ग आएकाे छ ।

शिक्षिका झाको तलब निकासा लिएर अपचलन गरेको भन्दै विद्यालयकै एक शिक्षकले अख्तियार दुरुपयोग अनुसन्धान आयोगमा निवेदन दिएपछि घटना बाहिरिएको हो ।

आयोगको कार्यालय बर्दिवासले प्रधानाध्यापक साहलाई बोलाएर स्पष्टीकरण लिएको छ । अख्तियारले फाइल मागेपछि अत्तालिएका प्रधानाध्यापकले हाजिरी रजिष्टरमा टिपेक्स लगाएर मेटाएकाे बताइएकाे छ ।

प्रधानाध्यापक साहले यस विषयमा प्रतिक्रिया दिन चाहनुभएकाे छैन । नगरपालिकाकाे शिक्षा शाखा प्रमुख सुवोध लामाले रकम झुक्किएर गएकाे र फिर्ता गराउने प्रक्रिया थालिएको बताउनुभएकाे छ ।

संविधानसभा सदस्य तथा पूर्वप्रदेश सांसद जगत यादबले यस प्रकरणमा प्रधानाध्यापक र नगरपालिकाका शिक्षा शाखा प्रमुखको मिलिभगत देखिएकाे बताउनुभयाे ।

गोलबजार नगरपालिकाका प्रमुख प्रशासकीय अधिकृत हरिलाल पुरीले आफूले फाइल अध्ययन गरिरहेको र दोषी जो देखिए पनि कारवाही गर्ने बताउनुभयाे ।