घाम लाग, घाम लाग (बालकविता)

हेर न नाना हाम्रो फाटेकाे छ बेसरी, लुक्यौ भने तिमी घाम तापौँ कसरी ?

ललिता ‘दोषी’

माघ ४, २०८१ शुक्रबार ०१:२१

घाम लाग, घाम लाग
बादल छिटो भाग न
जाडो भो ठिहिर्‍यायो
आऊ न घाम आँगन ।

हेर न नाना हाम्रो
फाटेकाे छ बेसरी
लुक्यौ भने तिमी
घाम तापौँ कसरी ?

भोक लागे खाना छैन
न जाडोमा नाना
छुन पनि पाएनौँ नि
कपीका ती पाना ।

आमाबाबु छैनन् हाम्रा
टुहुरा हौँ हामी
आऊ न घाम यता आऊ
रमाइलो मानी ।

ललिता ‘दोषी’

(ललिता ‘दोषी’ २०४१ सालमा ‘शुभकामना’ शीर्षकको कविता प्रकाशन गरी नेपाली साहित्यमा प्रवेश गर्नुभएकाे हाे । उहाँका तीन दर्जनभन्दा बढी साहित्यिक कृतिहरू प्रकाशित छन् ।)