जुनियर चेस उपाधि अग्रिम सैंजुलाई

नेपाल बुद्धिचाल महासंघको प्राविधिक सहयोगमा शनिबारदेखि तीन दिनसम्म चलेको नेपाल भारत मैत्री विद्यालय बुद्धिचाल प्रतियोगितामा नेपालका अग्रिम सैंजुले भारतका एस एबर भुटियामाथि जित दर्ता गर्दै उपाधि जित्न सफल हुनुभएको छ । 

यु ११ उमेर समूहको चौथो चरणमा पेभेलियन चेस एकेडेमीका सैंजुले सिक्किम चेस एशोसिएसन, भारतका चेस खेलाडी भुटियालाई पराजित गर्नसक्नु नै उपाधि जितको कारण बनेको थियो । 

यसै समूहमा पाँचौं चरणको खेल विजेतासँग पराजित हुँदा आयोजक पुष्पसदन स्कुलका हार्दिक पन्त ६ अंकका साथ दोश्रो हुनुभयो । भारतका भुटिया टाइब्रेकरमा तेश्रो हुनुभएको छ । 

यसैगरी गोल्डेन पिक हाइस्कुलका आयुष शर्मा र लेबोरोटरी स्कुलका अंकुर पोखरेल समान ५.५ अंक जोड्दै चौथो र पाँचौ हुनुभएको छ । 

क्रमशः माछापुच्छ्रे आइ बोर्डिङ स्कुलका साहस श्रेष्ठ, अन्नपूर्ण स्कुलका अबिरल तामाङ, पुष्पसदनका शुभम् बास्कोटा, सिक्किम चेसका यधन्त अग्रवाल, स्वस्तिश्री गुरुकलका एआईएम आर्नभ अर्याल समान ५ अंक जोडेर दसौं स्थानमा उभिन सफल बन्नुभएको छ । 

यसैगरी यु १३ छात्रतर्फको प्रतिस्पर्धामा ६.५ अंकका साथ सिक्किम चेस एसोसिएसनका निरभ ढकालले पहिलो स्थान हात पार्नुभएको छ । पाठशाला सेकेन्डरी स्कुलका ओस्कार पन्थी ६ अंक बनाएर द्वितीय स्थानमा रहनुभयो भने समान ६ अंक जोड्दै त्रियोग हाइस्कुलका आभाष रिमाल तृतीय स्थानमा रहन सफल हुनुभयो । 

यसै समूहमा अन्नपूर्ण स्कुलका युनिष खड्का ५.५ अंक बनाइ चौथो हुनुभयो । ज्ञानोदय बालबाटिकाका प्रविर केसी, हिमालयन चेस एकेडेमीका सात्विकमान तुलाधर, त्रियोगका सम्पन्न बज्राचार्य, श्रीजनकल्याण सेकेन्डरीका सोहन श्रेष्ठ, माउन्ट भ्यु स्कूलका सत्यम पाठक र हिमालयन बोर्डिङ स्कुलका गौरव पौडेल समान ५ अंक बनाउँदै दशौंसम्म रहनुभएको छ । 

यु १५ समूहमा भारतका अभनिश प्रधानले उत्कृष्ट खेल प्रस्तुत गर्दै उपाधि उचाल्नुभएको छ । सिक्किम चेस एसोसिएसनबाट प्रतियोगितामा सहभागी हुनुभएका प्रधानले सात चरणको खेलमा अपराजित ७ अंक जोड्नुभएको हो ।

पुष्पसदन बोर्डिङ सेकेन्डरी स्कुलले आयोजना गरेको विद्यालयस्तरीय प्रतियोगिता यसै समूहमा आयोजक स्कुलका सुप्रभसागर श्रेष्ठले ५.५ अंक बनाउँदै दोश्रो स्थान हात पार्नुभएको छ । समान ५.५ अंक प्रोग्रेसिभ टाइब्रेकर प्वाइन्ट आधारमा मातृभूमि स्कुलका सविद प्रजापति तृतीय हुनुभएको छ ।

यस्तै त्रियोग हाइस्कुलका सइस घिमिरे, संस्कृति अन्तर्राष्ट्रिय स्कुलका स्पर्श सरावगी, अन्नपूर्ण सेकेन्डरीका आयुष बोहरा, पेभेलियन चेस एकेडेमीका कसिभ कार्की, हिलटाउन सेकेन्डरी स्कुलका रसिल महर्जन र हिमालयन चेस एकेडेमीका रिचेन डोमजोन समान ५ अंक प्राप्त गर्दै क्रमशः चौथोदेखि नवौं स्थान ओगट्न सफल हुनुभयो । त्रियोग हाइस्कुलका सक्रित कुइँकेल ४.५ अंक जोडेर दशौं हुनुभयो । 

समापन समारोहमा कीर्तिपुर नगरपालिकाका मेयर कृष्णमान डंगोलले विजेता विद्यार्थी खेलाडीलाई आकर्षक ट्रफी, मेडल, प्रमाणपत्र हस्तान्तरण गर्नुभएको छ । उहाँले पुष्पसदन स्कुलको सानो प्रयासमा नै २४७ जना खेलाडी सहभागी भएको अवगत गराउँदै अर्को संस्करणको अन्तर्राष्ट्रिय खेल पनि आयोजना गर्ने बताउनुभयो ।