सात महिनासम्म बालबालिकाले पाएनन् दिवा खाजा

पर्सा जिल्लाका १४ पालिकामध्ये बहुदरमाई नगरपालिकाका १८ सामुदायिक विद्यालय र छिपहरमाई गाउँपालिकाका विद्यालयहरूमा हालसम्म दिवाखाजा सञ्चालनमा आउन सकेको छैन ।

नयाँ शैक्षिक सत्र सुरु भएदेखि नै नियमित खाजा वितरण हुनुपर्ने भए पनि सात महिनासम्म यो सेवा उपलब्ध गराउन नसकिएको हो ।

असार मसान्तसम्मको बजेट समयमै निकासा भए पनि व्यवस्थापनमा समस्या र विवादका कारण विद्यार्थीहरूले यो सुविधा लिन पाएका छैनन् ।

बहुदरमाई नगरपालिकाका सामुदायिक विद्यालयहरूमा दिवाखाजा सञ्चालन रोकिनुको मुख्य कारण आन्तरिक विवाद रहेको छ । आर्थिक कारोबार सञ्चालनमा आएको जटिलताले गर्दा विद्यालयहरूमा खाजाको व्यवस्था हुन नसकेको हो ।

छिपहरमाई गाउँपालिकामा प्रमुख प्रशासकीय अधिकृत नहुँदा खाजा सञ्चालनमा ढिलाइ भएको शिक्षाका शाखा प्रमुख मुकेश चौरसियाले जानकारी दिए । उनले पुसको दोस्रो सातादेखि खाजा वितरण व्यवस्था गर्ने तयारी भइरहेको पनि बताए ।

सरकारले बाल विकासदेखि कक्षा ६ सम्मका विद्यार्थीहरूको लागि प्रतिविद्यार्थी दैनिक रु. १५ को दरले खाजाको व्यवस्था गर्दै आएको छ ।

छिपहरमाई गाउँपालिकाले व्यवस्थापनमा सुधार गर्दै पुस महिनाबाट खाजा वितरण सुनिश्चित गर्ने तयारी गरेको जानकारी दिएको छ । यसले विद्यार्थी र अभिभावकलाई केही राहत मिल्ने अपेक्षा गरिएको छ।

यो समस्या समाधानका लागि सम्बन्धित निकायहरूले चाँडो पहल गर्नु आवश्यक छ, ताकि विद्यार्थीहरूले आधारभूत सुविधाबाट वञ्चित हुन नपरोस् ।