ट्रिटन कलेजमा लागुऔषध दुर्व्यसनविरुद्ध सचेतना (भिडियाे)

काठमाडौंको कोटेश्वरस्थित ट्रिटन कलेजले लागुऔषध दुर्व्यसनविरुद्ध सचेतनामूलक कार्यक्रम गरेको छ । यसअन्तर्गत बुधबार कक्षा ११ र १२ का सम्पूर्ण विद्यार्थीलाई सन्देशमूलक चलचित्र 'सरी मम' देखाइएको छ । 

नेपाली र सामाजिक विषयको पाठ्यक्रममा समावेश भएका विषयवस्तुअनुरुप विद्यार्थीलाई मनोरञ्जनात्मक तवरले दुर्व्यसनविरुद्ध जागरुक गर्न चलचित्र देखाइएको कलेजले जनाएको छ ।

कक्षा ११ की सुष्मा दाहालले आफूजस्ता किशोरकिशोरीलाई लागुऔषध दुर्व्यसनविरुद्धको सचेतना प्रभावकारी भएको बताउनुभयो । ‘लागुपदार्थको प्रयोगबाट किशोरकिशोरीलाई बचाउन विद्यालय र परिवारको समेत महत्वपूर्ण जिम्मेवारी हुन्छ,’ उहाँले भन्नुभयो ।

कक्षा १२ का अमित सिंहले विद्यालयको अतिरिक्त क्रियाकलापमा यस्ता विषय समावेश गरिनुपर्ने बताउनुभयो । ‘बुक फ्रि फ्राइडेमा लागुऔषध दुर्व्यसनजस्तो गम्भीर विषयमा ज्ञान दिनु जरुरी छ,’ उहाँले भन्नुभयो । 

नेपाली विषयकी विभागीय प्रमुख सविता मैनालीले नेपाली समाजलाई दुर्व्यसनमुक्त बनाउन देशभरिका विद्यालयमा यस्ता प्रयोगात्मक क्रियाकलापको अत्यन्तै जरुरी रहेकोमा जोड दिनुभयो ।

सामाजिक विषयका विभागीय प्रमुख खेमराज आचार्यले किशोरावस्थाका भाइबहिनीमा चेतना अभिवृद्धि गराई दुर्व्यसनीबाट बचाउन विद्यालयहरुले महत्वपूर्ण भूमिका खेल्नुपर्ने बताउनुभयो ।

विद्यार्थीलाई यस्ता विषयमा ज्ञान दिन कक्षामा गरिने अध्यापनले मात्रै पूर्ण नहुने भएकाले चलचित्र, डकुमेन्ट्री, क्षेत्र भ्रमणजस्ता कार्यमा जोड दिइएको व्यवस्थापन र कानुन संकायका संयोजक कमानसिंह आरसीले जानकारी दिनुभयो ।

चलचित्रका नायक प्रभात पालले  आफ्नाे चलचित्रले लागुपदार्थ दुर्व्यसनकाे लतमा फसेका एक जना मात्रै किशाेरलाई त्यसबाट मुक्त गर्न सक्याे भने पनि सफल भएकाे ठान्ने बताउनुभयाे ।