'अपाङ्गता भएका बालबालिकाको अधिकार सुनिश्चित गर्नुपर्छ'

उपसभामुख इन्दिरा रानाले अपाङ्गता भएका बालबालिकाको अधिकार सुनिश्चित गर्नुपर्ने बताउनुभएकाे छ ।

राष्ट्रिय बालअधिकार परिषद्ले आयोजना गरेको ‘अपाङ्गता भएका बालबालिकाको निःसंस्थागतकरण, नीति र अभ्यासमा समावेशी गुणस्तरीय शिक्षा तथा अपाङ्गता जाँच उपकरणको संस्थागत प्रयोगसम्बन्धी’ संवाद कार्यक्रममा अपाङ्गता भएका बालबालिकाको अधिकार सुनिश्चित गर्नका लागि आवश्यक कानुन बनाउनुपर्नेमा रानाले जोड दिनुभएकाे हाे । उहाँले स्थानीय तहबाटै अपाङ्गता बालबालिकामैत्री कानुन बन्नुपर्ने बताउनुभयाे ।

शिक्षा विधेयक समावेशी बनाउन आफूले भूमिका खेल्ने उपसभामुख रानाको भनाइ थियो । अपाङ्गता भएका बालबालिकासम्बन्धी नीतिलाई कार्यान्वयन गर्न सबैले दबाब दिनुपर्ने बताउँदै उहाँले अपाङ्गता भएका बालबालिकाको पहुँच शिक्षामा समग्ररुपमा अरु बालबालिकाजस्तै पुर्याउनुपर्नेमा जोड दिनुभयाे । 

परिषद्का अध्यक्ष बमबहादुर बानियाले अपाङ्गता भएका व्यक्तिका लागि नीति बने पनि कार्यान्वयनमा समस्या रहेको बताउनुभयाे । कार्यक्रमको उद्देश्यमाथि प्रकाश पार्दै हातेमालो समाज नेपालका अध्यक्ष डिल्लीराम गिरीले अपाङ्गता भएका बालबालिकामाथि सरकारले लगानी गरेमात्र बालअधिकार सुनिश्चित हुने बताउनुभयाे ।

नीति र अभ्यासमा समावेशी गुणस्तरीय शिक्षासम्बन्धी प्रस्तुतीकरण गर्दै शिक्षा तथा मानवस्रोत विकास केन्द्रका निर्देशक सविता दङ्गालले ३३ विशेष र २३ एकीकृत विद्यालयबाट करिब ३३ हजार अपाङ्गता भएका बालबालिकालाई शिक्षा प्रदान गरिरहेको बताउनुभयाे । उहाँका अनुसार केन्द्रले करिब एक हजार तीन सय विद्यार्थीलाई बे्रललिपीका पाठ्य सामग्री उपलब्ध गराएको छ ।

केन्द्रका अधिकृत दीपक माझीले करिब १० हजार ८ सय ८२ अपाङ्गता भएका बालबालिका वैकल्पिक स्याहार केन्द्रमा रहेको जानकारी दिनुभयाे ।