विद्यालयहरूमा यौन तथा प्रजनन स्वास्थ्यसम्बन्धी अभिमुखीकरण

वीरगञ्जका विद्यालयहरूमा सुरक्षित गर्भपतन, बृहत्तर यौनिकता शिक्षा, र यौन तथा प्रजनन स्वास्थ्यसम्बन्धी अभिमुखीकरण कार्यक्रम सुरु गरिएको छ । युवा संस्थाद्वारा वीरगञ्जमा चार वर्षदेखि सञ्चालित युथ एक्सेस परियोजनाअन्तर्गत अभिमुखीकरण सुरु गरिएको हो ।

परियोजनाअन्तर्गत पहिलो दिन वीरगञ्ज महानगरपालिका वडा नम्बर २१ परवानीपुरस्थित ज्ञानसागर एकेडेमीमा कक्षा ९ र १० मा अध्ययनरत विद्यार्थीहरूलाई अभिमुखीकरण प्रदान गरिएको छ ।

कार्यक्रममा युवाका युथ च्याम्पियनहरू सुस्मिता चालिसे, रुची पटेल, अंगिकृत कर्ण, नवसिन तनविर मिकरानी, अफ्ताब आलम, सुजित गुप्ता, मुसाफिर गद्दी, पवनकुमार साह, प्रिन्सकुमार साह र राजन झालगायतको सहभागिता थियो ।

युथ च्याम्पियनहरूले विद्यार्थीलाई लिंग र लैंगिकताको भिन्नता, लिंगका प्रकार, प्रजनन स्वास्थ्य, महिनावारी सुरक्षालगायतका विषयमा प्रशिक्षण दिनुभएकाे थियाे । 

विगत चार वर्षदेखि वीरगञ्जमा सञ्चालित युथ एक्सेस परियोजनाले सुरक्षित गर्भपतन र यौनिकतासम्बन्धी जानकारी अभिवृद्धि गर्दै युवाहरूलाई सशक्त बनाउने उद्देश्यले काम गरिरहेको छ ।