‘बालबालिकासम्बन्धी ऐन कार्यान्वयनको अवस्था बुझ्न स्थलगत भ्रमण गरिने’

राष्ट्रिय सभाकाे विधायन व्यवस्थापन समितिमा बालबालिकासम्बन्धी ऐन २०७५ को ऐन कार्यान्वयन मापन सम्बन्धमा छलफल भएको छ । सिंहदरबारमा शुक्रबार बसेको समितिकाे बैठकले ऐन कार्यान्वयन मापन सम्बन्धमा छलफल गरेको हो ।

समिति सभापति तुलसाकुमारी दाहालले बालबालिकासम्बन्धी ऐन २०७५ को कार्यान्वयन मापन सम्बन्धमा स्थलगत भ्रमण गर्ने विषयमा छलफल भएको बताउनुभयाे । उहाँले दुई  ठाउँमा स्थानीय भ्रमणको कुरा राखिएको जानकारी दिनुभयाे ।

‘बालबालिकासम्बन्धी ऐन २०७५ को कार्यान्वयन मापन सम्बन्धमा स्थलगत भ्रमण गर्ने विषयमा छलफल भएको छ,  दुई ठाउँमा स्थानीय भ्रमणको कुरासमेत गरेका छौं,' उहाँले भन्नुभयाे, 'कोशी र मधेश प्रदेशमा त्यसैगरी लुम्बिनी  र कर्णाली प्रदेशमा अनुगमन गर्ने छौं । त्यसमा तीनवटा विषयवस्तु केन्द्रित रहने छौं । बालबलिकासँग छुट्टै छलफल गर्छौं । स्थानीय स्तरमा बाल क्लबमा रहेका बालबालिकासँग छलफल गर्नेछौं । बाल क्लबमा बालबालिकाको अवस्था के छ भनेर समेत छलफल हुनेछ । साथै स्थानीय सरकारसँग पनि यो विषयमा छलफल गर्ने छौं ।’

उहाँले महिला शिक्षा शाखा र स्थानीय सरकारले बनाएका ऐनका बारेमा समेत मध्यनजर गरेर छलफल गरिने बताउनुभयाे । उहाँले प्रदेश तहमा प्रदेश सरकारले बालबालिकासम्बन्धी कस्तो  खालको नीति बनाएका छन् र त्यो नीतिको  कार्यान्वयनको अवस्था के छ भनेर बाल सहभागिताको विषमा छलफल गरिने समेत जानकारी दिनुभयाे ।