१४ वर्षमुनिका क्यान्सर बिरामीकाे उपचार नि:शुल्क

सरकारले १४ वर्षमुनिका बालबालिकाकाे क्यान्सर उपचार र औषधी नि:शुल्क गरेकाे छ । स्वास्थ्य तथा जनसंख्यामन्त्री प्रदीप पौडेल विश्व बाल दिवसको अवसर पारेर बुधबार भक्तपुर क्यान्सर अस्पतालमा बाल क्यान्सरकाे नि:शुल्क उपचार सेवा शुभारम्भ गर्नुभएकाे हाे ।

मन्त्री पौडेलले १४ वर्षमुनिका क्यान्सर बिरामीको उपचार र औषधीसमेत नि:शुल्क दिने व्यवस्था मिलाइएको जानकारी दिनुभयाे । अहिलेसम्म औषधिसमेत नि:शुल्क हुने कुनै पनि सेवा राज्यले घोषणा नगरेको परिस्थितिमा आफूहरुले तयारीका साथ उक्त सेवा घोषणा गरेको बताउनुभयाे । 

‘बालबालिकालाई अस्पतालले उपलब्ध गराउन सक्ने सबै सेवा र औषधी पनि नि:शुल्क गरिएकाे यो पहिलो चोटी हो, औषधिसमेत नि:शुल्क हुने कुनै पनि सेवा राज्यले योभन्दा अगाडि घोषणा गरेको छैन, हामीले तयारीका साथ यो घोषणा गरेका छौं,’ मन्त्री पाैडेलले भन्नुभयाे ।

स्वास्थ्य तथा जनसंख्या मन्त्रालयको निर्देशनबमोजिम अस्पतालले १४ वर्षमुनिका क्यान्सर बिरामीहरुलाई मंसिर २ देखि निःशुल्क उपचार सेवा शुरु गरिसकेको छ ।