बालबालिकाप्रति जिम्मेवार र सजग रहन आग्रह

वन तथा वातावरण मन्त्री ऐनबहादुर शाही ठकुरीले बालबालिकाप्रति जिम्मेवार र अधिकारप्रति सजग रहन आग्रह गर्नुभएकाे छ । 

विश्व बाल दिवसको अवसरमा बुधबार आयोजित कार्यक्रमलाई सम्बोधन गर्दै मन्त्री शाहीले बालबालिका भविष्यका कर्णधार भएकाले उनीहरुको हेरचाह,  शिक्षा, स्वास्थ्य र विकासले मात्र समाजको निर्माण सम्भव हुने बताउनुभएकाे हाे ।

उहाँले भन्नुभयाे, ‘आजको दिन बालबालिकाप्रति जिम्मेवार र अधिकारप्रति प्रतिबद्धता व्यक्त गर्ने अवसर पनि हो । बालबालिका हाम्रा भविष्यका कर्णधार हुन् । उनीहरुको हेरचाह, शिक्षा, स्वास्थ्य र विकासले मात्र समाजको निर्माण सम्भव छ तर जलवायु परिवर्तन, गरिबी र सामाजिक असमानताजस्ता चुनौतीहरुले बालबालिकामा प्रभाव परिरहेको अवस्था छ ।’

साथै, उहाँले नेपाल सरकारको तर्फबाट बालबलिकाहरुको अधिकार सुनिश्चित गर्न र बालबालिकाको आवश्यकतालाई नीति तथा कार्यक्रममा समावेश गर्ने बताउनुभयाे । उहाँले  जलवायु  परिवर्तनबाट हुने प्रभावलाई कम गर्न सरकार प्रतिबद्ध रहेको समेत बताउनुभयाे ।

उहाँले जलवायु परिवर्तनका कारण सम्बन्धित क्षेत्रका बालिकाहरुको सुरक्षित र स्वच्छ जीवनका लागि सरकारले प्रभावकारी नीति र कार्यान्वयनलाई प्राथमिकता दिँदै आएको बताउनुभयाे ।