'बालबालिका र किशोरकिशोरीका समस्या समाधान गर्न उपयुक्त प्रबन्ध गर्छाैं'

प्रतिनिधिसभाका सभामुख देवराज घिमिरेले बालबालिका, किशोरकिशोरीसम्बन्धी समस्या समाधान गर्न उपयुक्त प्रबन्ध मिलाउने बताउनुभएकाे छ । 

राष्ट्रिय किशोरी तथा किशोर सञ्जालको भक्तपुरमा भएको राष्ट्रिय भेलाको निष्कर्ष हस्तान्तरण कार्यक्रममा उहाँले किशोरकिशोरीका समस्यासम्बन्धमा विभिन्न संघसंस्थाले दिएका सुझाव पूर्ण कार्यान्वयन गर्न आवश्यक छलफल गर्ने बताउनुभयाे । 

उहाँले भन्नुभयाे, ‘प्रजातान्त्रिक वातावरणमा जनताका विचार, समस्या र चाहनाभित्र बालबालिका र किशोरकिशोरीका समस्यालाई विभिन्न क्लब वा संघसंस्थामार्फत आएका सुझाव पूर्ण कार्यान्वयन गर्न आवश्यक छलफल र बहसहरु गर्नेछौं । यसका लागि उपयुक्त प्रबन्ध मिलाउन संसदमा प्रभावकारी छलफल गर्नेछौं ।’

उहाँले सातवटै प्रदेशमा काम गरिरहेका क्लब वा संघसंस्था, किशोरकिशोरी र अल्पसंख्यकले व्यहोरिरहेका समस्याको विश्लेषण र सम्भावनामाथिको बहस हुनु जरुरी रहेको बताउनुभयाे ।