बालपुस्तक विकास मापदण्ड र पुस्तक नीतिबारे अन्तर्क्रिया

विद्यालय तहका बालबालिका र स्वतन्त्र पाठकका लागि गुणस्तरीय पुस्तक कसरी विकास गर्न सकिन्छ भन्ने बारेमा लेखक, प्रकाशक, अनुवादकलगायत सम्बद्ध सरोकारवालाबीच मंगलबार अन्तर्क्रिया कार्यक्रम सम्पन्न भएको छ ।

कार्यक्रममा शिक्षा, विज्ञान तथा प्रविधिमन्त्री  विद्या भट्टराईले २०६४ सालदेखि अध्ययन गरी तयार पारिएको पुस्तक नीतिको मस्यौदालाई बहुपक्षीय छलफल गरी आवश्यकता अनुसार परिमार्जनसहित स्वीकृत  गरिने बताउनुभयो ।

शिक्षा, विज्ञान तथा प्रविधि मन्त्रालय र रुम टु रिडको संयुक्त आयोजनामा सञ्चालित कार्यक्रममा बालपुस्तक विकास तथा छनोटसम्बधी मापदण्ड २०८१ माथि पृष्ठपोषण संकलन गरिएको थियो । कार्यक्रममा राष्ट्रिय पुस्तक नीति २०८१ माथि अन्तर्क्रिया गरिएको थियो ।

अन्तर्क्रियामा पुस्तक लेखन र प्रकाशनलाई व्यवस्थित गर्दै सिक्ने सिकाउने कुरालाई संस्कारका रूपमा विकास गर्न विविध सुझाव प्राप्त भएका छन् । प्राप्त सुझावलाई समेटेर राष्ट्रिय पुस्तक नीतिलाई अन्तिम रूप दिइने मन्त्रालयले जनाएको छ ।

कार्यक्रममा मन्त्रालयका सचिव, सहसचिव, प्राध्यापक, लेखक, प्रकाशक, वितरक, सञ्चारकर्मी लगायतको उपस्थिति थियो ।