छात्रालाई आत्मरक्षा तालिम दिँदै वीरगञ्ज महानगर

वीरगञ्ज महानगरपालिकाले नगरभित्रका १० हजारभन्दा बढी छात्रालाई आत्मरक्षाकाे तालिम दिने भएकाे छ ।

बुधवार बिहान १० बजे वीरगञ्जको आदर्शनगर रङ्गशालामा सुरु हुने तालिममा नगरभित्रका सामुदायिक र निजी विद्यालय तथा कलेजका कक्षा ६ देखि १२ सम्मका छात्रा सहभागी हुनेछन् । आत्मरक्षामार्फत किशोरीहरूलाई सशक्त बनाउन तालिम दिन लागिएकाे हाे ।

तालिमकाे तयारीबारे जानकारी दिन आयाेजित पत्रकार सम्मेलनमा महानगर प्रमुख राजेशमान सिंहका अनुसार एकसाथ १० हजारभन्दा बढी छात्रालाई आत्मरक्षाको तालिम दिएर गिनिज बुक अफ वर्ल्ड रेकर्डमा नाम लेखाउने योजना छ । यो पहलले वीरगञ्जलाई अन्तर्राष्ट्रिय स्तरमा चिनाउने मात्र नभई सम्पूर्ण नेपाललाई गौरवान्वित गर्ने उहाँले बताउनुभयाे । 'यो तालिमले छात्रालाई आत्मरक्षामा सक्षम बनाउनुका साथै समाजमा महिला सशक्तीकरणको महत्त्वलाई प्रवर्धन गर्नेछ,' उहाँले भन्नुभयाे ।

तालिमका लागि भारतबाट मार्सल आर्ट प्रशिक्षक डा. चिता यजनेश शेट्टीलाई विशेष रूपमा बोलाइएको छ । नेपाल भारत सहयोग मञ्चको समन्वयमा आयोजना गरिने कार्यक्रमलाई थप प्रभावकारी बनाउनका लागि डा. शेट्टीजस्तो धेरै भारतीय कलाकारलाई तालिम दिइसक्नुभएका अनुभवी प्रशिक्षकलाई निमन्त्रणा गरिएको महानगरले जनाएकाे छ ।

महानगरका निमित्त प्रमुख प्रशासकीय अधिकृत अरविन्द लाल कर्णका अनुसार प्रशिक्षण कार्यक्रमलाई व्यवस्थित र सुरक्षित बनाउन विशेष सुरक्षा प्रबन्ध मिलाइएको छ । सहभागी छात्राहरूलाई विद्यालयबाट प्रशिक्षण स्थलसम्म सुरक्षित रूपमा ल्याउन र फर्काउन सम्पूर्ण व्यवस्था भइसकेको छ ।