एभरेष्ट त जहिले पनि जान पाए हुन्थ्याे जस्ताे लाग्छ : पूर्णिमा श्रेष्ठ (भिडियाे)

 

फोटो पत्रकारका रूपमा परिचय बनाउनुभएकी पूर्णिमा श्रेष्ठ अहिले पर्वतारोहीका रूपमा बढी चिनिनुहुन्छ । उहाँले विश्वको सर्वोच्च शिखर सगरमाथाको चारपटक सफल आरोहण गर्नुभएको छ । एकै सिजनमा तीनपटक सगरमाथा आरोहण गर्ने पहिलो महिला बन्नुभएकी उहाँ विश्वको सातौं अग्लो हिमाल धवलागिरिको चुचुरोमा पुग्ने पनि पहिलो महिला हुनुहुन्छ । 

गोरखा जिल्लाको आरुघाट–३ मा जन्मनुभएकी श्रेष्ठ सानैदेखि जीवनमा केही ठूलो काम गर्न चाहनुहुन्थ्यो । पछि फोटो पत्रकार बन्नुभयो । त्यही क्रममा उहाँलाई हिमाल चढ्ने हुटहुटी जाग्यो । 

उहाँले सुरुमै विश्वको अग्लो शिखर सगरमाथा आरोहण गर्ने सोच बनाउनुभयो । तर, उहाँसँग कुनै अनुभव वा तालिम थिएन । सबैले पहिला सानो हिमाल आरोहण गर्न सल्लाह दिएपछि उहाँले सन् २०१७ सेप्टेम्बरमा विश्वको आठौं अग्लो हिमाल मनास्लु आरोहण गर्नुभयो । 

२०१८ मा उहाँले सगरमाथाको सफल आरोहण गर्नुभयो । २०१९ मा अमादब्लमको शिखर चुम्नुभयो । २०२१ मा उहाँले अन्य ६ महिलासँगै अन्नपूर्णको चुचुरोमा टेक्नुभयो । र, २०२१ अक्टोबरमै धवलागिरि आरोहण गर्नुभयो । २०२४ मे २५ मा उहाँले चौथोपटक सगरमाथाको सफल आरोहण गर्नुभयो ।

विश्वका ८ हजारमाथिका १४ वटै हिमाल आरोहणको लक्ष्य लिनुभएकी उहाँले हालसम्म सगरमाथा, माउन्ट केटुसहित आठवटा हिमाल आरोहण गरिसक्नुभएको छ । 

हिमाल चढ्नभन्दा त्यसका लागि लाग्ने खर्च जुटाउन गाह्रो भएको उहाँ बताउनुहुन्छ । मनास्लु हिमाल आरोहण गर्ने बेलामा त ऋण खोजेर गएको उहाँले बताउनुभयो ।

हिमाल आरोहणका क्रममा गर्नुपरेका संघर्ष र अनुभवका विषयमा उनै साहसिक पर्वतारोही श्रेष्ठसँग पाठशाला स्कुलमा कक्षा ९ मा अध्ययनरत छात्रा श्रेया सापकोटाले गर्नुभएको संवाद ।