चक्रवात 'यागी' का कारण ६० लाख बालबालिका प्रभावित : युनिसेफ

तस्बिर : युनिसेफ

चक्रवात यागीले निम्त्याएको बाढी र पहिरोका कारण दक्षिणपूर्वी एसियामा करिब ६० लाख बालबालिका प्रभावित भएको युनिसेफले जनाएको छ ।

यागीले दुई साताअघि भियतनाम, थाइल्यान्ड, लाओस र म्यानमारमा शक्तिशाली हावा र भारी वर्षा निम्त्याएको थियो । थाइल्यान्डले बुधबार थप तीन जनाको मृत्यु भएको जनाएसँगै यस क्षेत्रमा कुल ५३७  जनाको मृत्यु भएको पुष्टि भएको छ ।  

युनिसेफले स्वच्छ पानी, शिक्षा, स्वास्थ्य सेवा, खाना र आश्रयको पहुँच सम्झौताको आधारमा यागीबाट प्रभावित बालबालिकाको सङ्ख्या उल्लेख गरेको हो ।  

कमजोर बालबालिका तथा परिवारहरूले यागीले निम्त्याएको विनाशकारी परिस्थिति सामना गर्न बाध्य भएको युनिसेफका पूर्वी एसिया प्रशान्तका क्षेत्रीय निर्देशक जुन कुनुगीले बताउनुभएको छ ।  

भियतनाममा पिउने पानी र सरसफाइको अभावका कारण करिब ३० लाख मानिस रोगको जोखिममा रहेको युनिसेफले जनाएको छ । म्यानमारमा बाढीका कारण करिब चार लाख मानिस विस्थापित भएका छन् । 

युनिसेफले यागीले म्यानमारमा गम्भीर मानवीय अवस्था निम्त्याएकाे र सीमान्तकृत समुदायलाई  सङ्कटमा धकेलेको उल्लेख गरेको छ ।  

विश्व खाद्य कार्यक्रमले म्यानमारमा यसैसाता पाँच लाख मानिसलाई एक महिनाको आपतकालीन खाद्यान्न वितरण गर्ने जनाएको छ ।

युनिसेफका अनुसार जलवायु परिवर्तन र मानवीय खतराले पूर्वी एसिया र प्रशान्त क्षेत्रका बालबालिकालाई व्यापक असर गर्ने जनाएको छ ।