शिक्षा क्षेत्रको पछौटेपन हटाउन सरकार लागिपरेको छ : प्रधानमन्त्री

आज असोज २ गते राष्ट्रिय शिक्षा दिवस हो । 

नेपालको संविधानले प्रत्याभूत गरेको शिक्षासम्बन्धी मौलिक हकलाई कार्यान्वयनमा लैजाने क्रममा अनिवार्य तथा निःशुल्क शिक्षा ऐन २०७५ जारी भएको दिन असोज २ गते राष्ट्रिय शिक्षा दिवस मनाउने गरिएको छ । 

शिक्षा, विज्ञान तथा प्रविधि मन्त्रालयले यो वर्षका लागि ‘ज्ञान, विज्ञान, सिप, उद्यम र मौलिकता : साझेदारी प्रणालीगत सक्षमता’ आदर्श वाक्य तय गरेको छ । साताभरि देशैभर विभिन्न कार्यक्रमको आयोजना गरेर शिक्षा दिवस मनाइँदैछ । 

प्रधानमन्त्री केपी शर्मा ओलीले राष्ट्रिय शिक्षा दिवस २०८१ मूल समारोह समितिको कार्यक्रमलाई बुधबार सम्बोधन गर्दै एसइई नतिजा ७० प्रतिशतसम्म पुर्‍याउन नीतिगत पहल सुरु भइसकेको बताउनुभएको छ । 

‘एसइईको नतिजामा उल्लेख्य सुधार गर्नुपर्छ भनेर उत्तीर्ण प्रतिशत बढाउन नीतिगत पहल सुरू भइसकेको छ, हामीसँग कुरा मात्रै गरेर बस्ने समय छैन,’ उहाँले भन्नुभयो । हाल कायम रहेको शिक्षा क्षेत्रको पछौटेपन हटाउन सरकार लागिपरेको उहाँले बताउनुभयो ।

त्यसअघि प्रधानमन्त्री ओलीले शिक्षा दिवसका अवसरमा शुभकामना व्यक्त गर्दै अनिवार्य तथा निःशुल्क आधारभूत शिक्षा र निःशुल्क माध्यमिक शिक्षाको लक्ष्य हासिलका लागि तीनै तहका सरकारबीच आपसी समन्वय, सहकार्य र सहअस्तित्वमा आधारित भएर लगानीमा साझेदारी अभिवृद्धि गर्नुपर्ने अवस्था रहेको प्रधानमन्त्री ओलीको शुभकामना सन्देशमा उल्लेख छ ।

उहाँले पिछडिएका वर्ग, क्षेत्र, लिङ्ग र जातजातिलाई शिक्षाको मूलधारमा समाहित गरी गुणस्तरीय शिक्षाको समान अवसरको वितरण गर्नुपर्नेमा जोड दिनुभएको छ । उहाँले प्रदेशगत र स्थानीयगत शिक्षाका सबै तह एवं अवसरमा हुने असमानता हटाई समान अवसर र लाभको सुनिश्चितता गर्नु अपरिहार्य रहेको उल्लेख गर्नुभएको छ । साथै बालबालिकाको सर्वाङ्गीण विकासका लागि जिम्मेवार र जवाफदेही भएर स्वउत्प्रेरित भई थप योगदान गर्न सफलता मिलोस् भन्ने कामना गर्नुभएको छ ।

उहाँले शिक्षा क्षेत्रका लागि बजेटको अंश वृद्धि गर्दै दिगो विकासका लक्ष्य हासिल गर्न र विद्यालय शिक्षा विधेयक, २०८१ लाई छलफलसहित पारित गराउन सरकार प्रतिबद्ध रहेको बताउनुभएको छ ।